குஜராத்தில் 5 ஆண்டுகளில் 41 ஆயிரம் பெண்கள் மாயம் - அதிர்ச்சி தகவல்
செய்தி முன்னோட்டம்
குஜராத் மாநிலத்தில் கடந்த 5 ஆண்டுகளில் 41 ஆயிரத்திற்கும் மேற்பட்ட பெண்கள் மாயமானதாக தேசிய குற்ற ஆவண காப்பகம்(என்.சி.ஆர்.பி.) தெரிவித்துள்ளது.
கடந்த 2016ம் ஆண்டு 7,105 பெண்கள், 2017ம் ஆண்டு 7,712 பெண்கள், 2018ம் ஆண்டு 9,246 பெண்கள், 2019ம் ஆண்டு 9,268 பெண்கள், 2020ம் ஆண்டு 8,290 பெண்கள் மாயமாகியுள்ளார்கள்.
இதன்படி, 5 ஆண்டுகளில் மொத்தம் 41 ஆயிரத்து 621 பெண்கள் காணாமல் போயுள்ளதாக தகவல்கள் தெரிவிக்கிறது.
இது குறித்து முன்னாள் ஐபிஎஸ் அதிகாரியும், குஜராத் மாநில மனித உரிமைகள் ஆணையம் உறுப்பினரான கதிர் சின்ஹா கூறுகையில், சில காணாமல்போன கடத்தல் வழக்குகளில் சிறுமிகளும், பெண்களும் குஜராத் தவிர மற்ற மாநிலங்களுக்கு பாலியல் தொழிலுக்கு அனுப்பப்படுவதை நான் கவனித்துள்ளேன் என்று கூறினார்.
கடத்தல்
அகமதாபாத் மற்றும் வதோதராவில் 4,722 பெண்கள் மாயம்
தொடர்ந்துப்பேசிய அவர், காணாமல் போனவர்கள் குறித்த வழக்குகளை காவல்துறை தீவிரமாக கையாளாத காரணத்தினால்தான் பெண்கள் கடத்தல் எண்ணிக்கையானது அதிகரித்துள்ளது.
இந்த வழக்குகள் கொலை வழக்குகளை விட தீவிரமானது.
எனவே, ஒரு கொலை வழக்கினை விசாரிப்பது போல், காணாமல் போனோர் வழக்குகளையும் மிககடுமையாக காவல்துறையினர் விசாரிக்க வேண்டும் என்று அவர் தெரிவித்துள்ளார்.
மேலும் அகமதாபாத் மற்றும் வதோதராவில் 2019-2020ஆண்டில் மட்டும் 4,722பெண்கள் காணாமல் போயுள்ளனர் என்றும் தகவல்கள் தெரிவிக்கிறது.
இந்த விவகாரம் தொடர்பாக பேசிய குஜராத் காங்கிரஸ் செய்தித்தொடர்பாளர் ஹிரேன் பேங்கர், கேரளா பெண்கள் குறித்து பாஜக தலைவர்கள் விமர்சிக்கிறார்கள்.
ஆனால் நாட்டின் பிரதமர் மற்றும் உள்துறை அமைச்சரின் சொந்த மாநிலமான குஜராத்தில் 41000க்கும் மேற்பட்ட பெண்கள் காணாமல் போயுள்ளார்கள் என்று ஆவேசமாக பேசியுள்ளார்.