பெண்களுக்கு மாதவிடாய் விடுப்பு வழங்கினால் வேலைவாய்ப்பு கிடைப்பதில் பிரச்சனை ஏற்படலாம்: உச்ச நீதிமன்றம்
பெண்களுக்கு மாதவிடாய் விடுப்பை கட்டாயமாக்குவது அவர்களுக்கு வேலை கிடைப்பதில் பாதிப்பை ஏற்படுத்தலாம் என்றும், அதுவே அவர்களுக்கு பாதமாக முடியவும் வாய்ப்புள்ளது என்றும் உச்ச நீதிமன்றம் இன்று கூறியுள்ளது. மேலும், இது நீதிமன்றங்கள் முடிவு செய்ய வேண்டிய விஷயம் அல்ல என்றும் உச்ச நீதிமன்றம் தெரிவித்துள்ளது. மாதவிடாய் விடுப்புக்கான கொள்கைகளை வகுக்க மத்திய மற்றும் மாநிலங்களுக்கு உத்தரவிடக் கோரிய பொது நல வழக்கை(பிஐஎல்) விசாரித்த தலைமை நீதிபதி டி.ஒய்.சந்திரசூட், "அத்தகைய விடுப்புகளை கட்டாயமாக்குவது பெண்கள் பணியிடத்தில் இருந்து ஒதுக்கப்படுவதற்கு வழிவகுக்கும். அதை நாங்கள் விரும்பவில்லை. பெண்களைப் பாதுகாக்க நாங்கள் முயற்சி செய்கிறோம். இது அவர்களுக்குப் பாதகமாகமுடிய வாய்ப்பிருக்கிறது" என்று கூறியுள்ளார்.
மாதிரி கொள்கையை வடிவமைக்குமாறு மத்திய அரசுக்கு அறிவுறுத்தல்
"இது உண்மையில் அரசாங்கத்தின் கொள்கை பற்றியதாகும். அதை நீதிமன்றங்கள் முடிவு செய்ய முடியாது" என்று உச்ச நீதிமன்றம் கூறியுள்ளது. இந்த பிரச்சனை பல கொள்கை அம்சங்களுடன் தொடர்புடையது என்றும், இதில் நீதிமன்றம் தலையிட எந்த காரணமும் இல்லை என்றும் நீதிபதிகள் தெரிவித்துள்ளனர். "இந்த கோரிக்கையை பெண்கள் மற்றும் குழந்தைகள் மேம்பாட்டு அமைச்சகத்தின் செயலாளரிடமும், கூடுதல் சொலிசிட்டர் ஜெனரல் ஐஸ்வர்யா பதியிடமும் எடுத்த செல்ல மனுதாரர்களை நாங்கள் அனுமதிக்கிறோம். இந்த விஷயத்தை கொள்கை அளவில் ஆராய்ந்து, அனைத்து பங்குதாரர்களுடன் கலந்தாலோசித்து மாதிரி கொள்கையை வடிவமைக்குமாறு செயலாளரைக் கேட்டுக்கொள்கிறோம்." என்று உச்ச நீதிமன்றம் தெரிவித்துள்ளது.