சிலிண்டர் தட்டுப்பாடா? யாரும் பயப்பட வேண்டாம்! மத்திய அரசின் அதிரடி அறிவிப்பு மற்றும் புதிய கட்டுப்பாடுகள்
செய்தி முன்னோட்டம்
அமெரிக்கா - ஈரான் போர் காரணமாக உலகளவில் எரிசக்தி சூழலில் நிச்சயமற்ற நிலை நிலவினாலும், இந்தியாவில் கச்சா எண்ணெய் மற்றும் சமையல் எரிவாயு விநியோகம் சீராக உள்ளதாக மத்திய பெட்ரோலிய அமைச்சகம் தெரிவித்துள்ளது. சிலிண்டர்கள் தட்டுப்பாடு ஏற்படும் என்று அச்சமடைந்து மக்கள் முன்கூட்டியே சிலிண்டர்களைப் பதிவு செய்யவோ அல்லது பதுக்கவோ தேவையில்லை என்று பெட்ரோலிய அமைச்சகத்தின் இணைச் செயலாளர் சுஜாதா சர்மா புதன்கிழமை (மார்ச் 11) அன்று தெரிவித்துள்ளார்.
2.5 நாட்கள்
2.5 நாட்களில் சிலிண்டர் விநியோகம்
தற்போதுள்ள விநியோகச் சங்கிலி மிகவும் உறுதியாக உள்ளது என்று கூறிய சுஜாதா சர்மா, வாடிக்கையாளர்கள் சிலிண்டரை முன்பதிவு செய்த 2.5 நாட்களுக்குள் (சுமார் 60 மணிநேரம்) அவை வீடுகளுக்கு விநியோகம் செய்யப்படும் என உறுதி அளித்துள்ளார். சர்வதேச சந்தையில் விலை உயர்வு ஏற்பட்ட போதிலும், அதன் பெரும் பகுதியை அரசே ஏற்று நுகர்வோரைப் பாதுகாத்து வருவதாகவும் அவர் குறிப்பிட்டார்.
புதிய கட்டுப்பாடு
முன்பதிவு இடைவெளி அதிகரிப்பு
தற்காலிகத் தேவையை மேலாண்மை செய்ய, இரண்டு சிலிண்டர் முன்பதிவுகளுக்கு இடையிலான குறைந்தபட்ச கால இடைவெளியை அரசு மாற்றியமைத்துள்ளது. முன்னர் 21 நாட்களுக்கு ஒருமுறை சிலிண்டர் பதிவு செய்யலாம் என்ற நடைமுறை இருந்தது. இது சமீபத்தில் 25 நாட்களுக்கு ஒருமுறை மட்டுமே அடுத்த சிலிண்டரை முன்பதிவு செய்ய முடியும் என மாற்றப்பட்டது. இந்த நடவடிக்கை தேவையற்ற முன்பதிவுகளைக் கட்டுப்படுத்தவும், அனைவருக்கும் சிலிண்டர் கிடைப்பதை உறுதி செய்யவும் எடுக்கப்பட்டுள்ளது.
மாற்று வழிகள்
கச்சா எண்ணெய் இறக்குமதி மற்றும் மாற்று வழிகள்
இந்தியாவின் கச்சா எண்ணெய் இறக்குமதி வழிகள் மிகவும் பரவலாக்கப்பட்டுள்ளன. நாட்டின் மொத்த இறக்குமதியில் 70 சதவீதம் ஹார்முஸ் ஜலசந்தி அல்லாத பிற கடல் வழிகள் வழியாகவே நடைபெறுகிறது. தற்போது இரண்டு எல்என்ஜி கப்பல்கள் புதிய ஆதாரங்களிலிருந்து இந்தியா நோக்கி வந்து கொண்டிருப்பதாகவும் அரசு தெரிவித்துள்ளது. இதனால் உள்நாட்டு பைப்லைன் எரிவாயு மற்றும் வாகனங்களுக்கான சிஎன்ஜி விநியோகத்தில் எவ்வித பாதிப்பும் இருக்காது என்று விளக்கப்பட்டுள்ளது.
உணவகங்கள்
விலையேற்றம் மற்றும் உணவகங்களின் நிலை
கடந்த மார்ச் 7 ஆம் தேதி முதல் சிலிண்டர் விலை ரூ. 60 உயர்த்தப்பட்டதைத் தொடர்ந்து, டெல்லியில் வீட்டு உபயோக சிலிண்டர் விலை ரூ.913 ஆகவும், வணிக சிலிண்டர் விலை ரூ.1,883 ஆகவும் உள்ளது. தட்டுப்பாட்டைச் சமாளிக்கப் பல நகரங்களில் உள்ள உணவகங்கள் இண்டக்ஷன் அடுப்புகள் மற்றும் மின்சார ஓவன்களுக்கு மாறி வருகின்றன. வீட்டு உபயோகத்திற்கான சிலிண்டர் விநியோகத்திற்கே அரசு தற்போது முன்னுரிமை அளித்து வருவது குறிப்பிடத்தக்கது.