குற்றவாளிகளின் செலவில் கெஜ்ரிவால் 7 நட்சத்திர ஹோட்டலில் தங்கினார்: அமலாக்கத்துறை
டெல்லி முதல்வர் அரவிந்த் கெஜ்ரிவால் 2022 ஆம் ஆண்டு மாநில சட்டமன்றத் தேர்தலின் போது கோவாவில் உள்ள ஏழு நட்சத்திர விடுதியில் தங்கியிருந்ததாக அமலாக்க இயக்குனரகம் (ED) உச்ச நீதிமன்றத்தில் இன்று தெரிவித்துள்ளது. ஆம் ஆத்மி கட்சியின்(ஏஏபி) பிரச்சாரத்திற்காக சட்டவிரோத நிதியை நிர்வகித்த சன்பிரீத் சிங், இந்த செலவுகளுக்கு பணம் கொடுத்ததாக ED குற்றம் சாட்டியுள்ளது. மக்களவை தேர்தல் பிரசாரம் செய்வதற்காக இடைக்கால ஜாமீன் கோரி கெஜ்ரிவால் தாக்கல் செய்த மனுவை உச்சநீதிமன்றம் இன்று விசாரித்து வருகிறது. கெஜ்ரிவாலுக்கு ஜாமீன் கொடுப்பதற்கு எதிராக வாதாடி வரும் அமலாக்க இயக்குனரகம், இந்த தகவலை தெரிவித்துள்ளது. டெல்லி மதுக் கொள்கையுடன் தொடர்புடைய பணமோசடி வழக்கில் கெஜ்ரிவால் மார்ச் 21 அன்று அமலாக்க இயக்குநரகத்தால் கைது செய்யப்பட்டார்.
தொழிலதிபர்களிடம் இருந்து 100 கோடி ரூபாய் பெற்றார் கெஜ்ரிவால்: ED
ஏப்ரல் 1ஆம் தேதி முதல் திகார் சிறையில் அடைக்கப்பட்டுள்ள அவர், நீதிமன்றக் காவலில் உள்ளார். ஊழல் மூலமாக கிடைத்த சட்டவிரோத நிதியில் ஆம் ஆத்மி அதிகமாக பயனடைந்ததாக அமலாக்க இயக்குனரகம் குற்றம் சாட்டியுள்ளது. கோவா மற்றும் பஞ்சாப் மாநிலங்களில் தேர்தல் பிரச்சாரம் நடத்த ஆம் ஆத்மி கட்சி அந்த பணத்தை செலவழித்ததாக ED குற்றம் சாட்டியுள்ளது. தொழிலதிபர்களுக்கு சாதகமாக மதுபானக் கொள்கையை உருவாக்குவதற்காக அவர்களிடம் இருந்து 100 கோடி ரூபாயை கெஜ்ரிவால் பெற்றதற்கான ஆதாரம் இருப்பதாகவும் அமலாக்க இயக்குனரகம் கூறியுள்ளது. உச்ச நீதிமன்ற நீதிபதிகள் சஞ்சீவ் கண்ணா மற்றும் தீபங்கர் தத்தா ஆகியோர் அடங்கிய அமர்வு இன்று கெஜ்ரிவாலின் ஜாமீன் மனுவை விசாரித்து வருகிறது.
