ஐஎன்எஸ் அரிதமன்: இந்தியாவின் கடல்சார் பாதுகாப்பிற்கு வலுசேர்க்கும் மூன்றாவது அணுசக்தி நீர்மூழ்கிக் கப்பல் தயார்
செய்தி முன்னோட்டம்
இந்தியாவின் பாதுகாப்புத் திறனை உலக அரங்கில் பறைசாற்றும் வகையில், மூன்றாவது உள்நாட்டு அணுசக்தி நீர்மூழ்கிக் கப்பலான 'ஐஎன்எஸ் அரிதமன்' (INS Aridhaman) விரைவில் இந்திய கடற்படையில் இணையவுள்ளது. இதனைப் பாதுகாப்புத் துறை அமைச்சர் ராஜ்நாத் சிங் தனது எக்ஸ் பக்கத்தில் உறுதிப்படுத்தியுள்ளார். "அரிதமன் என்பது வெறும் வார்த்தையல்ல, அது ஒரு சக்தி" என்று அவர் குறிப்பிட்டுள்ளார். ஏற்கனவே சேவையில் உள்ள ஐஎன்எஸ் அரிஹந்த் (2016) மற்றும் ஐஎன்எஸ் அரிகாட் (2024) ஆகிய கப்பல்களைத் தொடர்ந்து, அரிதமன் தனது இறுதி கடல்சார் சோதனைகளை முடித்துவிட்டு, தற்போது போர் முனையில் இணையத் தயாராக உள்ளது.
தொழில்நுட்ப மேம்பாடு
மேம்படுத்தப்பட்ட தொழில்நுட்பம் மற்றும் அசுர ஏவுகணை பலம்
ஐஎன்எஸ் அரிதமன் தனது முன்னோடி கப்பல்களை விடச் சற்றே பெரியது மற்றும் சுமார் 7,000 டன் எடையைக் கொண்டது. பாபா அணு ஆராய்ச்சி மையம் உருவாக்கிய மேம்படுத்தப்பட்ட 83 மெகாவாட் அழுத்தப்பட்ட நீர் உலை மூலம் இது இயக்கப்படுகிறது. இதன் மிக முக்கியமான சிறப்பம்சம் என்னவென்றால், இதில் 8 செங்குத்து ஏவுகணை குழாய்கள் உள்ளன. இது ஐஎன்எஸ் அரிஹந்தை விட இரண்டு மடங்கு திறனைக் கொண்டது. இதன் மூலம் 3,500 கிமீ தூரம் வரை சென்று தாக்கும் 8 கே-4 ஏவுகணைகளையோ அல்லது 750 கிமீ தூரம் வரை பாயும் 24 கே-15 ஏவுகணைகளையோ சுமந்து சென்று எதிரி நாடுகளின் இலக்குகளைத் துல்லியமாகத் தாக்க முடியும்.
சவால்
எதிரி நாடுகளுக்குச் சவாலான 'இரண்டாவது தாக்குதல்' திறன்
அணுசக்தி நீர்மூழ்கிக் கப்பல்கள் இந்தியாவின் பாதுகாப்பு வியூகத்தில் மிக முக்கியப் பங்கு வகிக்கின்றன. இந்தியாவின் நிலப்பரப்பில் உள்ள ஏவுகணைத் தளங்கள் அல்லது விமானப்படைத் தளங்கள் மீது எதிரிகள் தாக்குதல் நடத்தினாலும், கடலுக்கு அடியில் பல வாரங்கள் பதுங்கியிருக்கும் இந்த நீர்மூழ்கிக் கப்பல்கள் மூலம் இந்தியா மிகக் கடுமையான பதிலடித் தாக்குதலை நடத்த முடியும். இதனால் இந்தியா மீது முதல் அணுசக்தித் தாக்குதலை நடத்த நினைக்கும் எந்தவொரு எதிரி நாட்டிற்கும் இது ஒரு தற்கொலை முடிவாகவே அமையும். ஐஎன்எஸ் அரிதமனின் வருகை, இந்தியக் கடற்படை எப்போதும் ஒரு நீர்மூழ்கிக் கப்பலைக் கடலில் ரோந்துப் பணியில் வைத்திருக்க உதவும்.
விசாகப்பட்டினம்
விசாகப்பட்டினத்தில் தாராகிரி போர்க் கப்பலும் அரிதமனும்
பாதுகாப்புத் துறை அமைச்சர் ராஜ்நாத் சிங் விசாகப்பட்டினத்திற்கு வருகை தந்துள்ள நிலையில், இந்த அறிவிப்பு வெளியாகியுள்ளது. அங்கு அவர் 'தாராகிரி' என்ற அதிநவீன ஸ்டீல்த் போர்க்கப்பலை கடற்படையில் இணைக்கும் நிகழ்வில் பங்கேற்றார். விசாகப்பட்டினம் இந்தியாவின் அணுசக்தி நீர்மூழ்கிக் கப்பல்களின் கட்டுமான மையமாகவும், அவற்றின் தாயகமாகவும் திகழ்கிறது. தாராகிரி கப்பல் எதிரிகளின் ரேடாரில் சிக்காத வடிவமைப்பைக் கொண்டதுடன், சூப்பர்சோனிக் ஏவுகணைகள் மற்றும் நீர்மூழ்கிக் கப்பல்களை வேட்டையாடும் நவீன ஆயுதங்களையும் கொண்டுள்ளது.
கடல்சார் வல்லரசு
உலகளாவிய கடல்சார் வல்லரசாக உருவெடுக்கும் இந்தியா
ஐஎன்எஸ் அரிதமன் மற்றும் தாராகிரி ஆகிய இரண்டு கப்பல்களும் 'மேக் இன் இந்தியா' திட்டத்தின் கீழ் உள்நாட்டிலேயே தயாரிக்கப்பட்டவை என்பது இந்தியாவிற்குப் பெருமை சேர்க்கும் விஷயமாகும். தாராகிரி கப்பல் போர்க்காலப் பணிகளுக்காக மட்டுமன்றி, இயற்கைச் சீற்றங்களின் போது மனிதாபிமான உதவி மற்றும் மீட்புப் பணிகளிலும் ஈடுபடும் வகையில் வடிவமைக்கப்பட்டுள்ளது. இத்தகைய தொடர்ச்சியான நவீனமயமாக்கல் மூலம், இந்தியப் பெருங்கடல் பிராந்தியத்தில் சீனா மற்றும் பாகிஸ்தானின் அச்சுறுத்தல்களைச் முறியடித்து, இந்தியா ஒரு அசைக்க முடியாத கடல்சார் வல்லரசாகத் தன்னை நிலைநிறுத்திக் கொண்டுள்ளது.