ஆண்டுக்கு இரண்டு முறை உடற்தகுதித் தேர்வுகள்; இந்திய ராணுவ அதிகாரிகளுக்கான விதிகளில் திருத்தம்
செய்தி முன்னோட்டம்
இந்திய ராணுவம் அதன் படைகளின் போர் தயார்நிலையை மேம்படுத்தும் நோக்கில், புதிய உடற்தகுதி விதிகளை அறிவித்துள்ளது. இந்த மாற்றங்களின்படி, 60 வயது வரையிலான அக்னிவீரர்கள் முதல் மூன்று நட்சத்திர ராணுவத் தளபதிகள் வரை அனைவரும் இனி ஆண்டுக்கு இருமுறை ஒருங்கிணைந்த உடற்தகுதித் தேர்வுகளில் பங்கேற்று, அதில் தேர்ச்சி பெற வேண்டும். புதிய விதிமுறைகள் ஏப்ரல் 1, 2026 முதல் நடைமுறைக்கு வரும் என்று அதிகாரிகள் தெரிவித்துள்ளனர். முன்னதாக, 50 வயது வரையிலான அதிகாரிகள் மற்றும் வீரர்களுக்கு மட்டுமே உடற்தகுதித் தேர்வுகள் கட்டாயமாக இருந்தன. ஆனால், புதிய விதிமுறைகள் கட்டளைத் தலைவர்கள் (Commanders) முன்மாதிரியாகச் செயல்பட வேண்டும் என்றும், எப்போதும் முன்னணியில் இருந்து அணியை வழிநடத்தும் திறன் கொண்டவர்களாக இருக்க வேண்டும் என்றும் வலியுறுத்துகின்றன.
உடற்தகுதி
விரைவாகவும் திறம்படவும் செயல்படுவதற்கு உடற்தகுதி அவசியம்
உடற்தகுதி வலிமை, சகிப்புத்தன்மை மற்றும் சுறுசுறுப்பு ஆகியவை போரில் விரைவாகவும், திறம்படவும் செயல்படுவதற்கு அவசியம் என்று இந்திய ராணுவம் அக்டோபர் 3 தேதியிட்ட கடிதத்தில் குறிப்பிட்டுள்ளது. தற்போதுள்ள இரண்டு தனித்தனித் தேர்வுகளுக்குப் (BPET, PPT) பதிலாக, புதிய ஒருங்கிணைந்த உடல் தகுதித் தேர்வுகள் அறிமுகப்படுத்தப்படுகின்றன. இதனால், ஒரு வருடத்தில் நடத்தப்படும் சோதனைகளின் எண்ணிக்கை எட்டு என்பதிலிருந்து இரண்டு எனக் குறையும். 50 முதல் 60 வயதுக்குட்பட்டவர்களுக்கான சோதனைகளில், 3.2 கி.மீ வேக நடைபயிற்சியுடன், குறிப்பிட்ட எண்ணிக்கையிலான சிட்-அப்கள் (sit-ups) மற்றும் புஷ்-அப்கள் (push-ups) அடங்கும். 45 வயதுக்குட்பட்டவர்கள் கயிறு ஏறும் திறனுக்காகவும் சோதிக்கப்படுவார்கள். இந்தத் தேர்வுகளில் குறைந்தபட்ச திருப்திகரமான தரத்தைப் பெறத் தவறுபவர்களின் பதவி உயர்வு பாதிக்கப்பட வாய்ப்புள்ளதாகவும் அதிகாரிகள் எச்சரித்துள்ளனர்.