நச்சுத்தன்மை வாய்ந்த மூன்று இருமல் மருந்துகள் குறித்து உலக சுகாதார நிறுவனத்திடம் இந்தியா தகவல்
செய்தி முன்னோட்டம்
இந்தியாவில் தயாரிக்கப்பட்ட மூன்று இருமல் மருந்துகள், அதிக நச்சுத்தன்மை கொண்ட டைஎதிலீன் கிளைகால் (Diethylene Glycol - DEG) எனப்படும் இரசாயனத்தால் நச்சுத்தன்மை கொண்டுள்ளதாக இந்திய மத்திய மருந்து தரக் கட்டுப்பாட்டு அமைப்பு (CDSCO) உலக சுகாதார நிறுவனத்திடம் (WHO) தெரிவித்துள்ளது. இந்த நச்சு கலந்த மருந்துகள் தமிழ்நாட்டைச் சேர்ந்த ஸ்ரீசன் பார்மசூட்டிகல்ஸ் மற்றும் குஜராத்தைச் சேர்ந்த ரெட்னெக்ஸ் பார்மசூட்டிகல்ஸ், ஷேப் பார்மா பிரைவேட் லிமிடெட் ஆகிய நிறுவனங்களால் தயாரிக்கப்பட்டவை ஆகும். பாதிக்கப்பட்ட மருந்துகள் கோல்ட்ரிஃப் (Coldrif), ரெஸ்பிஃப்ரெஷ் டிஆர் (Respifresh TR) மற்றும் ரெலைஃப் (ReLife) ஆகும்.
குழந்தைகள் இறப்பு
மத்திய பிரதேசத்தில் குழந்தைகள் இறப்பு
இந்த நச்சுத்தன்மை வாய்ந்த மருந்துகள் மத்தியப் பிரதேசத்தின் சிந்த்வாரா மாவட்டத்தில் 20 குழந்தைகள் இறந்த சம்பவங்களுடன் இணைக்கப்பட்டன. கோல்ட்ரிஃப் சிரப்பில் 48.6% DEG என்ற அபாயகரமான அளவு நச்சு இருப்பது கண்டறியப்பட்டது. அவசர நடவடிக்கையாக, இந்த மூன்று இருமல் மருந்துகளும் உடனடியாக விற்பனையிலிருந்து திரும்பப் பெறப்பட்டுள்ளதுடன், அவற்றைத் தயாரித்த நிறுவனங்களின் உற்பத்தி உரிமங்களும் ரத்து செய்யப்பட்டுள்ளன. பாதிக்கப்பட்ட மருந்துகள் எதுவும் வெளிநாடுகளுக்கு ஏற்றுமதி செய்யப்படவில்லை என்று இந்திய ஒழுங்குமுறை அமைப்பு WHOக்கு உறுதியளித்துள்ளது. இந்தத் துயரச் சம்பவங்களைத் தொடர்ந்து, சுகாதார அமைச்சகம் தற்போது தமிழ்நாடு, குஜராத், மத்தியப் பிரதேசம் உட்பட ஆறு மாநிலங்களில் உள்ள மருந்து உற்பத்தி தொழிற்சாலைகளில் ஆய்வுகளைத் தொடங்கியுள்ளது குறிப்பிடத்தக்கது.