ஈரானில் போர் மேகங்கள்? சிக்கித் தவிக்கும் இந்தியர்கள்; மத்திய அரசின் மெகா மீட்பு நடவடிக்கை நாளை ஆரம்பம்!
செய்தி முன்னோட்டம்
ஈரானில் தற்போது நிலவி வரும் பரவலான போராட்டங்கள் மற்றும் உள்நாட்டுப் பதற்றம் காரணமாக, அங்குள்ள பாதுகாப்புச் சூழல் கேள்விக்குறியாகியுள்ளது. போராட்டங்கள் தீவிரமடைந்து வருவதாலும், வான்வழிப் போக்குவரத்து துண்டிக்கப்படலாம் என்ற அச்சம் நிலவுவதாலும், அங்கு வசிக்கும் இந்தியக் குடிமக்களின் பாதுகாப்பு குறித்து மத்திய அரசு தீவிரக் கவனம் செலுத்தி வருகிறது. ஈரானில் சிக்கித் தவிக்கும் இந்தியர்களைப் பாதுகாப்பாக தாய்நாட்டிற்கு அழைத்துவர, இந்திய அரசு வெள்ளிக்கிழமை (ஜனவரி 16) முதல் மீட்புப் பணிகளைத் தொடங்க உள்ளதாக அதிகாரப்பூர்வ தகவல்கள் தெரிவிக்கின்றன. இதற்காக ஏர் இந்தியா மற்றும் இந்திய விமானப்படையின் சிறப்பு விமானங்கள் பயன்படுத்தப்பட வாய்ப்புள்ளதாகத் தெரிகிறது. முன்னதாக, ஈரானில் உள்ள இந்தியத் தூதரகம், அங்குள்ள இந்தியர்களைத் தொடர்பு கொண்டு அவர்களின் விபரங்களைச் சேகரிக்கும் பணியை முடுக்கிவிட்டுள்ளது.
அறிவுறுத்தல்
இந்தியத் தூதரகத்தின் அறிவுறுத்தல்கள்
ஈரானில் உள்ள இந்தியக் குடிமக்கள் தேவையற்ற பயணங்களைத் தவிர்க்குமாறும், தங்கள் இருப்பிடம் குறித்த தகவல்களைத் தூதரகத்தில் பதிவு செய்யுமாறும் ஏற்கனவே அறிவுறுத்தப்பட்டிருந்தது. போராட்டக் களங்களுக்கு அருகே செல்ல வேண்டாம் என்றும், உள்ளூர் சட்டதிட்டங்களுக்கு மதிப்பளித்து பாதுகாப்பாக இருக்குமாறும் இந்தியர்களுக்குத் தூதரகம் வேண்டுகோள் விடுத்துள்ளது. அவசரத் தேவைகளுக்காகச் சிறப்பு உதவி எண்களும் அறிவிக்கப்பட்டுள்ளன. இந்திய வெளியுறவுத் துறை அமைச்சகம் ஈரானிய அதிகாரிகளுடன் தொடர்ந்து தொடர்பில் இருந்து வருகிறது. இந்தியர்கள் பாதுகாப்பாக விமான நிலையங்களுக்கு வந்து சேருவதை உறுதி செய்யத் தேவையான ஒருங்கிணைப்புப் பணிகள் மேற்கொள்ளப்பட்டுள்ளன. இதற்கு முன்னதாக உக்ரைன் மற்றும் சூடான் போன்ற நாடுகளில் நடந்த சிக்கலான மீட்புப் பணிகளைப் போலவே, இந்த ஈரான் மீட்புப் பணியையும் வெற்றிகரமாக முடிக்க இந்தியா திட்டமிட்டுள்ளது.