பாதுகாப்புத் துறையில் வரலாற்று சாதனை! இந்தியாவின் முதல் 350 கிலோ டர்போஜெட் என்ஜின் தயார்
செய்தி முன்னோட்டம்
இந்திய பாதுகாப்புத் துறை மற்றும் விண்வெளித் தொழில்நுட்பத்தில் மிகப்பெரிய வரலாற்று சாதனையாக, நாட்டின் முதல் 350 கிலோ திறன் கொண்ட உள்நாட்டு எக்ஸ்பெண்டபிள் டர்போஜெட் என்ஜின் (Expendable Turbojet Engine) வெற்றிகரமாக உருவாக்கப்பட்டுள்ளது. பாதுகாப்பு ஆராய்ச்சி மற்றும் மேம்பாட்டு அமைப்பின் (டிஆர்டிஓ) கீழ் இயங்கும் கேஸ் டர்பைன் ஆராய்ச்சி நிறுவனம் (GTRE) இந்த என்ஜினை வடிவமைத்துள்ளது. நாட்டின் பாதுகாப்புத் தேவைகளுக்கு இது மிகப்பெரிய மைல்கல்லாகப் பார்க்கப்படுகிறது.
உற்பத்தி
ஆசாத் என்ஜினியரிங் நிறுவனம் உற்பத்தி செய்து ஒப்படைப்பு
இந்த அதிநவீன டர்போஜெட் என்ஜினை தயாரித்து அசெம்பிள் செய்யும் உற்பத்திக் கூட்டாளியாக ஹைதராபாத்தை சேர்ந்த ஆசாத் என்ஜினியரிங் நிறுவனத்தை GTRE தேர்வு செய்திருந்தது.
தொடர் முயற்சிகளுக்குப் பிறகு, தயாரிக்கப்பட்ட இந்த என்ஜின் ஜூலை 22 அன்று GTRE உயர் அதிகாரிகளிடம் முறைப்படி ஒப்படைக்கப்பட்டது.
இந்திய விஞ்ஞானிகள் மற்றும் உள்ளூர் தொழில் நிறுவனங்களின் கூட்டு முயற்சிக்குக் கிடைத்த மிகப்பெரிய வெற்றியாக இது கருதப்படுகிறது.
தொழில்நுட்பம்
உலகளவில் மிகச் சில நாடுகளிடம் மட்டுமே உள்ள தொழில்நுட்பம்
விமான மற்றும் ஏவுகணை என்ஜின் தொழில்நுட்பம் என்பது உலகளவில் மிகச் சில வல்லரசு நாடுகளிடம் மட்டுமே உள்ள மிகவும் கடினமான மற்றும் நுட்பமான பொறியியல் துறையாகும்.
தீவிர வெப்பநிலை மற்றும் அழுத்தத்தைத் தாங்கும் உலோகங்கள், துல்லியமான உற்பத்தித் தரம் ஆகியவை இதற்குத் தேவைப்படுகின்றன.
அந்த வரிசையில், இந்தியா தற்போது சொந்தமாக இத்தகைய என்ஜினை வெற்றிகரமாகத் தயாரித்திருப்பது உள்நாட்டுப் பாதுகாப்புத் துறையின் வளர்ந்து வரும் தொழில்நுட்ப ஆற்றலை உலகிற்கு பறைசாற்றியுள்ளது.
சுயசார்பு
பாதுகாப்புத் துறையில் அதிகரிக்கும் சுயசார்பு நிலை
மத்திய பாதுகாப்பு அமைச்சகம் மற்றும் டிஆர்டிஓ அமைப்பின் தலைவர்கள் இந்த வரலாற்று சாதனைக்குக் காரணமான விஞ்ஞானிகளுக்கும் ஆசாத் என்ஜினியரிங் நிறுவனத்திற்கும் தங்களது வாழ்த்துகளைத் தெரிவித்துள்ளனர்.
இந்த புதிய டர்போஜெட் என்ஜின் உற்பத்தி வெற்றி, இந்தியாவின் ஆத்மநிர்பார் பாரத் இலக்கை மேலும் வலுப்படுத்துவதுடன், எதிர்கால ராணுவப் பயன்பாட்டிற்கான ஏவுகணைகள் மற்றும் ட்ரோன்களின் தயாரிப்பிற்கும் மிகப்பெரிய ஊக்கமாக அமையும்.