புதுச்சேரி அமைச்சர் சந்திர பிரியங்கா பதவி ராஜினாமாவா? பதவி நீக்கமா? - தமிழிசை விளக்கம்
செய்தி முன்னோட்டம்
புதுச்சேரி மாநில ஒரே பெண் அமைச்சரான சந்திர பிரியங்கா சாதி மற்றும் பாலியல் ரீதியாக தான் தொடர்ந்து தாக்கப்படுவதாக கூறி கடந்த நேற்று முன்தினம் தனது பதவியை ராஜினாமா செய்தார்.
இது பெரும் அதிர்வலைகளை ஏற்படுத்திய நிலையில், இவ்விவகாரம் குறித்து சென்னை விமானநிலையத்தில் செய்தியாளர்களை சந்தித்த புதுச்சேரி துணைநிலை ஆளுநரான தமிழிசை சௌந்தரராஜன் விளக்கமளித்துள்ளார்.
அதன்படி அவர், 'பெண் அமைச்சரின் இந்த விவகாரம் எனக்கு மிகவும் கவலையளித்துள்ளது. அரசியலில் எந்த பெண் பாதிக்கப்பட்டாலும் நான் வருந்துவேன்' என்று கூறியுள்ளார்.
பிரச்சனை
'பிரியங்கா கூறியது போல் சாதி வேறுபாடு பிரச்சனை ஏதுமில்லை'-தமிழிசை
இதனை தொடர்ந்து பேசிய அவர், 'அவருக்கு இவ்வளவு பிரச்சனைகள் இருந்திருந்தால், பெண் துணை ஆளுநர் என்னும் முறையில் தம்மிடம் கூறியிருந்தால் நிச்சயம் நடவடிக்கைகள் எடுக்கப்பட்டு அவருக்கு உதவி செய்திருக்க கூடும் என்றும் கூறியுள்ளார்.
மேலும் அவர் பேசுகையில், 'இதில் என்ன வருத்தமென்றால் பிரியங்கா கூறியது போல அவரது சாதியை வைத்து எவ்வித ஏற்றத்தாழ்வு பிரச்சனை இருந்ததாக நான் பார்த்ததில்லை' என்றும்,
'முதல் அமைச்சர் ரங்கசாமி, அவரை தனது சொந்த மகள் போல்தான் கவனித்துக்கொண்டார். அதை நான் பலமுறை பார்த்துள்ளேன்' என்றும் கூறியுள்ளார்.
தொய்வு
பிரியங்காவிற்காக முதல்வரிடம் பரிந்து பேசிய தமிழிசை
இதற்கிடையே, கடந்த 6 மாதத்திற்கு முன்னரே அவரது பணியில் தொய்வு உள்ளது, திருப்தியாக இல்லை என்பதால் அவர் மீது நடவடிக்கை எடுக்கவேண்டும் என்று முதல்வர் தம்மிடம் கூறியதாக தமிழிசை தெரிவித்துள்ளார்.
அதற்கு, 'அமைச்சரவையில் இருப்பதே ஒரேயொரு பெண் அமைச்சர் தான். அதனால் அவரை அழைத்து பேசி, பணியில் கவனம் செலுத்துமாறு அறிவுறுத்துங்கள். ஏனென்றால் அவர் வைத்துள்ள துறைகள் அனைத்தும் மிக முக்கியமான துறைகள்' என்று முதல்வரிடம் தாம் பேசியதாகவும் கூறியுள்ளார் தமிழிசை.
நீக்கம்
பிரியங்கா மீது பதவி நீக்க நடவடிக்கை
அதன் பின்னரும் அவரது பணி திருப்தியளிக்காத காரணத்தினால், அவரை அமைச்சரவையில் இருந்து நீக்குமாறு முதல்வர், தமிழிசையை கேட்டுக்கொண்டதாகவும் கூறப்படுகிறது.
இதனால், அவர்மீது பதவி நீக்க நடவடிக்கை மேற்கொள்ளப்பட்டுள்ளது.
புதுச்சேரி ஓர் யூனியன் பிரதேசம் என்பதால் முதல்வரின் இந்த பதவி நீக்க நடவடிக்கை குறித்த கடிதம், மத்திய அரசுக்கு அனுப்பப்படும்.
அதனையடுத்து அதற்கு குடியரசு தலைவர் ஒப்புதல் அளிக்கவேண்டும்.
இது அனைத்தும் ஒரேநாளில் நடந்தது.
இதனை தெரிந்துகொண்ட சந்திர பிரியங்கா, தானாக ராஜினாமா செய்வது போல் அறிக்கை வெளியிட்டுள்ளார் என்று தமிழிசை கூறியுள்ளார்.
நீக்கம்
பிரியங்கா பதவி நீக்கம் குறித்து புதுச்சேரி சபாநாயகர்
மேலும், கட்சியில் பல மூத்த தலைவர்கள் இருந்த நிலையிலும் பெண்களுக்கு அங்கீகாரம் அளிக்கவேண்டும் என்று முதல்வர் பிரியங்காவிற்கு பல வாய்ப்புகளை கொடுத்தார்.
ஆனால் அவர் அதனை பயன்படுத்தி கொள்ளவில்லை என்று தமிழிசை வேதனை தெரிவித்துள்ளார்.
அதேபோல் இதுவரை புது அமைச்சர் பதவி ஏற்பு குறித்த எவ்வித தகவலும் தமக்கு வரவில்லை என்றும் அவர் கூறியது குறிப்பிடத்தக்கது.
இதற்கிடையே புதுச்சேரி சபாநாயகர் செல்வம், "3 நாட்களுக்கு முன்னரே பிரியங்கா பதவியில் இருந்து நீக்கப்பட்டு விட்டார். விரைவில் அதற்கான அரசாணை வெளியாகும்" என்று கூறியுள்ளார்.