டெல்லியில் 17 வயது பணிப்பெண்ணை சித்திரவதை செய்த தம்பதியருக்கு வேலை பறிபோனது
ஜார்கண்டில் உள்ள ராஞ்சியை சேர்ந்த 17வயதுடைய சிறுமி, ஓர் வேலைவாய்ப்பு நிறுவனம் மூலம் டெல்லி, குர்கானில் உள்ள ஒரு தம்பதியர் வீட்டில் குழந்தையை பார்த்துகொள்வதற்காக பணியமர்த்தப்பட்டுள்ளார். ஆனால் அந்த தம்பதியர் கடுமையாக வேலை வாங்கியதோடு, தினமும் அடித்து கொடுமைப்படுத்தியுள்ளார்கள். இதுகுறித்து சாகி மையத்தின் பொறுப்பாளரான பிங்கி மாலிக் அளித்த புகாரின்படி, அச்சிறுமியை காவல்துறையினர் மீட்டெடுத்துள்ளார்கள். அந்த 17வயது சிறுமியின் கைகள், கால்கள் மற்றும் வாய் என பல இடங்களில் காயம் ஏற்பட்டுள்ளது என்றும் காவல்துறை கூறியுள்ளனர். இதனைதொடர்ந்து கொடுமைப்படுத்திய தம்பதி மனிஷ் கட்டார்(36), கமல்ஜீத் கவுர்(34) ஆகியோரையும் போலீசார் கைது செய்துள்ளார்கள். இதுகுறித்து பாதிக்கப்பட்ட சிறுமி கூறுகையில், 5மாதங்களுக்கு முன்னர் தன்னுடைய மாமா தன்னை கட்டாரின் வீட்டில் தன்னை வேலைக்காக விட்டுசென்றதாக கூறியுள்ளார்.
பணிப்பெண்ணை நிர்வாணப்படுத்தி கொடுமைப்படுத்திய தம்பதி
மேலும், அந்த வீட்டில் அவரது மனைவி மற்றும் மகள் உள்ளனர். தினமும் தன்னை அடித்து கொடுமைபடுத்தி, இரும்பு கம்பியால் சூடு போடுவதோடு, உணவு கொடுக்காமல் கொடுமைப்படுத்தியதாக கூறியுள்ளார். தொடர்ந்து கட்டார் தன்னை நிர்வாணப்படுத்தி நிற்க வைத்து தனது அந்தரங்க பகுதிகளில் அடிமை கொடுமைப்படுத்துவார் என்றும் கூறினார். இத்தம்பதியர் தன்னை அடைத்து கொடுமைப்படுத்தியதோடு தனது குடும்பத்தாருடன் பேசவும் அனுமதிக்கவில்லை என்று தெரிவித்துள்ளார். இவர் அளித்துள்ள புகாரின்பேரில் அந்த தம்பதியர் மீது வழக்குபதிவு செய்யப்பட்டுள்ளதோடு, போக்ஸோ சட்டமும் பாய்ந்துள்ளது. இந்நிலையில் இவர்கள் செய்த குற்றம் வெளியில் தெரியவந்த நிலையில், கமல்ஜீத் பணிபுரியும் மக்கள் தொடர்பு நிறுவனம் மற்றும் கட்டார் பணிபுரிந்த இன்சூரன்ஸ் நிறுவனம் இவர்களை பணியில் இருந்து நீக்கியதாக இணையத்தில் பதிவு செய்துள்ளார்கள் என்பது குறிப்பிடத்தக்கது.
