முதலமைச்சர் விஜய் அமைச்சரவையில் இணையும் 2 காங்கிரஸ் எம்எல்ஏக்கள்; 60 ஆண்டு கால ஏக்கம் தீர்கிறது
செய்தி முன்னோட்டம்
தமிழக அரசியலில் சுமார் ஆறு தசாப்த கால நீண்ட இடைவெளிக்குப் பிறகு, மீண்டும் மாநில ஆட்சி அதிகாரத்தில் காங்கிரஸ் கட்சி பங்கெடுக்கவுள்ள வரலாற்று முக்கியத்துவம் வாய்ந்த நிகழ்வு அரங்கேறவுள்ளது. முதலமைச்சர் விஜய் தலைமையிலான புதிய அமைச்சரவையில், காங்கிரஸ் கட்சியின் இரண்டு சட்டமன்ற உறுப்பினர்கள் வியாழக்கிழமை அமைச்சர்களாகப் பதவியேற்க உள்ளதாகத் தகவல்கள் வெளியாகியுள்ளன. கடந்த 1960-களின் பிற்பகுதியில் திராவிடக் கட்சிகளின் எழுச்சிக்கு முன்பாக, தமிழ்நாட்டின் ஆளுங்கட்சியாக இருந்த காங்கிரஸ், அதன் பிறகு ஆட்சிக் கட்டிலில் அமரவில்லை. சுமார் 60 ஆண்டுகளாக திமுக அல்லது அதிமுக தலைமையிலான கூட்டணிகளில் ஒரு ஜூனியர் கட்சியாக மட்டுமே நீடித்து வந்த நிலையில், தற்போது தவெக ஆட்சியில் அதிகாரப் பகிர்வு கிடைத்துள்ளது காங்கிரஸ் தொண்டர்களின் நீண்ட காலக் கனவை நனவாக்கியுள்ளது.
MLA-க்கள்
புதிய அமைச்சர்களாகப் பதவியேற்கும் எம்எல்ஏக்கள்
நம்பத்தகுந்த வட்டாரங்களின்படி, சென்னை லோக் பவனில் நடைபெறவுள்ள பதவியேற்பு விழாவில் ஆளுநர் ஆர்.வி. அர்லேகர் புதிய அமைச்சர்களுக்குப் பதவிப் பிரமாணமும், ரகசியக் காப்புப் பிரமாணமும் செய்து வைக்கவுள்ளார். காங்கிரஸ் கட்சியின் சட்டமன்றக் குழுத் தலைவர் கே. ராஜேஷ் குமார் அமைச்சரவையில் இணைகிறார். மேலூர் தொகுதி காங்கிரஸ் சட்டமன்ற உறுப்பினர் பி. விஸ்வநாதன் புதிய அமைச்சராகப் பதவியேற்கிறார். நடந்து முடிந்த வரலாற்றுச் சிறப்புமிக்க சட்டமன்றத் தேர்தலில், பல தசாப்த கால திமுக-அதிமுகவின் ஆதிக்கத்தை உடைத்து தவெக ஆட்சி அமைத்தது. இத்தேர்தலில் 5 இடங்களில் வெற்றி பெற்ற காங்கிரஸ், தவெக கூட்டணிக்கு ஆதரவளித்த நிலையில் இப்போது அரசிலும் அங்கமாகிறது.
கூட்டணி
கூட்டணி மேலாண்மையும் துறை ஒதுக்கீடும்
இந்த மாத தொடக்கத்தில் முதலமைச்சராகப் பதவியேற்ற விஜய், இதுவரை விவசாயம் மற்றும் உயர்கல்வி உள்ளிட்ட சுமார் 20 முக்கியத் துறைகளுக்குத் தனி அமைச்சர்களை நியமிக்காமல் தன் வசம் வைத்திருந்தார். இது எதிர்க்கட்சிகளின் விமர்சனத்திற்கு உள்ளான நிலையில், இந்த அமைச்சரவை விரிவாக்கத்தின் மூலம் காலியாக உள்ள துறைகள் புதிய அமைச்சர்களுக்கு ஒதுக்கப்படவுள்ளன. இந்த அதிரடி நடவடிக்கை தவெக தலைமையிலான கூட்டணியை மேலும் வலுப்படுத்தும் என அரசியல் விமர்சகர்கள் கருதுகின்றனர்.