உயிர் காக்கும் உடலுறுப்பை 21 நிமிடங்களில் இலக்கைச் சேர உதவிய சென்னை மெட்ரோ ரயில்
செய்தி முன்னோட்டம்
உடலுறுப்பு தானம் குறித்த விழிப்புணர்வு அதிகரித்து வரும் நிலையில், சென்னை மெட்ரோ ரயில் நிறுவனம் (CMRL) ஒரு அரிய மருத்துவ அவசரப் பணியில் விரைந்து செயல்பட்டுப் பெரும் பங்காற்றியுள்ளது. பெங்களூரில் இருந்து விமானம் மூலம் சென்னைக்குக் கொண்டு வரப்பட்ட ஒரு தானம் செய்யப்பட்ட உடல் உறுப்பான நுரையீரலை, அறுவை சிகிச்சைக்கு உரிய நேரத்தில் மருத்துவமனைக்குக் கொண்டு சேர்ப்பிக்க CMRL உதவியது. பொதுவாக, மீனம்பாக்கம் விமான நிலையத்தில் இருந்து கிரீம்ஸ் சாலையில் உள்ள அப்பல்லோ மருத்துவமனைக்கு சாலை மார்க்கமாக ஆம்புலன்ஸில் செல்ல 40 முதல் 45 நிமிடங்கள் வரை ஆகும். நேரத்தைச் சேமித்து, உறுப்பின் செயல் திறனைக் காப்பாற்ற, மருத்துவக் குழுவினர் மெட்ரோ ரயில் சேவையைத் தேர்ந்தெடுத்தனர்.
மீனம்பாக்கம்
மீனம்பாக்கம் விமான நிலையத்தில் இருந்து மெட்ரோவில் கொண்டு செல்லப்பட்டது
அதன்படி, தானம் அளிக்கப்பட்ட நுரையீரலுடன் கூடிய மருத்துவக் குழுவினர் மீனம்பாக்கம் விமான நிலையத்தில் இருந்து மதியம் 2:07 மணிக்கு மீனம்பாக்கம் மெட்ரோ நிலையத்தை அடைந்தனர். மெட்ரோ ரயில் அதிகாரிகள் மற்றும் ஊழியர்களின் விரைவான ஒருங்கிணைப்புடன், மருத்துவக் குழு ரயில் மூலமாக உடனடியாகப் பயணத்தைத் தொடங்கியது. ஏழு ரயில் நிலையங்களில் நின்ற பிறகும், உறுப்பு வெறும் 21 நிமிடங்களில், அதாவது 2:28 மணிக்கு ஏஜி டிஎம்எஸ் மெட்ரோ நிலையத்தை வெற்றிகரமாகச் சென்றடைந்தது. அங்கிருந்து ஆம்புலன்ஸ் மூலம் மருத்துவமனைக்கு விரைந்த குழுவினர், நுரையீரல் மாற்று அறுவை சிகிச்சைக்கு உறுப்பைத் தயார் செய்தனர். CMRL நிறுவனம், இந்த நடவடிக்கையின் மூலம் அவசர மருத்துவச் சேவைகளுக்குத் தனது அர்ப்பணிப்பைப் பதிவு செய்துள்ளது.