சென்னை பாரிமுனையில் 35.4 செமீ மழை! மேக வெடிப்பு காரணமா? வானிலை ஆய்வு மையம் விளக்கம்
செய்தி முன்னோட்டம்
சென்னை மற்றும் அதன் சுற்றுவட்டாரப் பகுதிகளில் சனிக்கிழமை (அக்டோபர் 17) இரவு பெய்த திடீர் அதி கனமழை பொதுமக்கள் மத்தியில் பெரும் பரபரப்பை ஏற்படுத்தியது. குறிப்பாக சென்னை பாரிமுனை பகுதியில் ஒரே இரவில் 35.4 செமீ அளவுக்கு வரலாறு காணாத மழை பதிவாகியுள்ளதாக சென்னை மாநகராட்சி ஆணையர் சமீரன் அதிகாரப்பூர்வமாகத் தெரிவித்துள்ளார். இத்தகைய திடீர் மழையால் நகரின் பல்வேறு முக்கிய சாலைகள் மற்றும் தாழ்வான பகுதிகளில் அதிகளவில் மழைநீர் தேங்கி நகர்ப்புற வெள்ளப்பெருக்கு ஏற்பட்டது.
தமிழ்நாடு வெதர்மேன்
மேக வெடிப்பு காரணமா? தமிழ்நாடு வெதர்மேன் பதிவு
திடீரெனப் பெய்த இந்த அதிக மழை மேக வெடிப்பு காரணமாக உருவானதா என பொதுமக்கள் கேள்வி எழுப்பி வருகின்றனர்.
இதற்கு வலுசேர்க்கும் வகையில் தமிழ்நாடு வெதர்மேன் பிரதீப் ஜான் தனது எக்ஸ் தளத்தில் கருத்துப் பதிவிட்டுள்ளார்.
அதில், "சென்னையில் நிகழ்ந்தது மேக வெடிப்பா இல்லையா என்பதை மணிநேர வாரியான மழைப்பொழிவு தரவுகளையும், இந்திய வானிலை ஆய்வு மையத்தின் வரையறையையும் பார்த்து நீங்களே முடிவு செய்து கொள்ளுங்கள்." என அவர் குறிப்பிட்டுள்ளது விவாதத்தைத் தூண்டியுள்ளது.
காரணங்கள்
மேலடுக்கு சுழற்சியும் காற்றுகள் ஒன்றிணைதலும் காரணங்கள்
இம்மழை குறித்து சென்னை வானிலை ஆய்வு மையம் வெளியிட்டுள்ள அறிக்கையில் தெளிவான விளக்கங்களை அளித்துள்ளது.
வட தமிழகம் மற்றும் அதனை ஒட்டிய தெற்கு ஆந்திரக் கடலோரப் பகுதிகளில் கடல் மட்டத்திலிருந்து 4.5 கிமீ முதல் 5.8 கிமீ உயரம் வரை மேலடுக்கு சுழற்சி நிலவியது.
இச்சுழற்சி காற்றுகள் ஒன்றிணைவதையும் அதிகளவில் ஈரப்பதம் ஈர்க்கப்படுவதையும் ஊக்குவித்தது.
இதன் காரணமாக வளிமண்டலத்தில் ஆழமான குமுலோநிம்பஸ் மேகங்கள் தீவிரமடைந்து ஒரே இரவில் கனமழையைக் கொட்டித் தீர்த்துள்ளன.
வானிலை மையம்
மேக வெடிப்பு வரையறையும் வானிலை மையத்தின் முடிவும்
பொதுவாக 20 முதல் 30 சதுர கிலோமீட்டர் பரப்பளவில் ஒரு மணி நேரத்தில் 100 மிமீ அல்லது அதற்கு மேல் மழை பெய்வதே மேக வெடிப்பு எனக் கணக்கிடப்படுகிறது.
சென்னையில் பதிவான மழைப்பொழிவு சிறிய பகுதியில் நிகழ்ந்த மேக வெடிப்பைக் காட்டிலும், மேலடுக்கு சுழற்சியால் பரவலாகத் திரண்ட வெப்பச்சலன மேக செயல்பாட்டின் விளைவாக இருக்கலாம் எனத் தெரிகிறது.
இருப்பினும் குறிப்பிட்ட இடங்களின் தரவுகளை முழுமையாக மதிப்பீடு செய்த பிறகே அதிகாரப்பூர்வமாக வகைப்படுத்த முடியும் என வானிலை மையம் தெரிவித்துள்ளது.