ஜார்க்கண்ட் மாநிலத்தில் புதிய ஆட்சியை அமைக்க ஆளுநரிடம் சம்பாய் சோரன் கோரிக்கை
செய்தி முன்னோட்டம்
புதிய ஆட்சியை அமைக்க தனக்கு அழைப்பு விடுக்குமாறு ஆளுநர் சிபி ராதாகிருஷ்ணனிடம் தான் வலியுறுத்தியதாக ஜார்க்கண்ட் முக்தி மோர்ச்சா கட்சி தலைவர் சம்பாய் சோரன் இன்று தெரிவித்துள்ளார்.
பணமோசடி குற்றச்சாட்டின் பேரில் முன்னாள் முதல்வர் ஹேமந்த் சோரன் நேற்று மாலை அமலாக்க இயக்குனரகத்தால் வியத்தகு முறையில் கைது செய்யப்பட்டார்.
அப்போதிலிருந்து முதலமைச்சர் இல்லாததால், மாநிலத்தில் "குழப்பமான சூழ்நிலை" நிலவுவதாகவும் சம்பை சோரன் குறிப்பிட்டுள்ளார்.
ஜார்க்கண்ட் மாநிலத்தை ஜேஎம்எம்-காங்கிரஸ்-ராஷ்ட்ரீய ஜனதா தளம் ஆகிய கட்சிகளின் கூட்டணி ஆட்சி செய்து வருகிறது. இந்நிலையில், அம்மாநில முதல்வர் நேற்று கைது செய்யப்பட்டார்.
அதனால், ஆளும் கூட்டணியை சேர்ந்த 5 எம்எல்ஏக்களுடன் ராஞ்சியில் உள்ள ராஜ்பவனில் வைத்து ஆளுநர் ராதாகிருஷ்ணனை சம்பாய் சோரன் இன்று சந்தித்தார்.
ஜார்க்கண்ட்
"விரைவில் முடிவெடுப்பதாக ஆளுநர் உறுதியளித்தார்": சம்பாய் சோரன்
தற்போது அம்மாநிலத்தின் போக்குவரத்து துறை அமைச்சராக இருக்கும் சம்பாய் சோரன், தனக்கு ஆட்சி அமைக்க அதிகாரம் அளிக்க வேண்டும் என்று அம்மாநில ஆளுநரிடம் கேட்டு கொண்டுள்ளார்.
"நாங்கள் ஒற்றுமையாக இருக்கிறோம்... 43 எம்எல்ஏக்களும் சர்க்யூட் ஹவுஸில் (மாநில அரசு விருந்தினர் மாளிகை) தங்கியுள்ளனர்," என்று இன்று கூறிய சம்பாய் சோரன், "எங்கள் கோரிக்கை மீது விரைவில் முடிவெடுப்பதாக ஆளுநர் உறுதியளித்தார்." என்று தெரிவித்துள்ளார்.
"18 மணி நேரமாக மாநிலத்தில் அரசாங்கம் இல்லை. குழப்பமான சூழ்நிலை உள்ளது. அரசியலமைப்பு தலைவராக இருப்பதால், நீங்கள் விரைவில் ஒரு நல்ல அரசாங்கத்தை அமைப்பதற்கான நடவடிக்கைகளை எடுப்பீர்கள் என்று நாங்கள் எதிர்பார்க்கிறோம்..." என்று அவர் ஆளுநருக்கு கடிதம் எழுதியுள்ளார்.