பட்ஜெட் கூட்டத் தொடருக்கு முன்னதாக அனைத்துக் கட்சிக் கூட்டத்தை கூட்டியது மத்திய அரசு
வரவிருக்கும் நாடாளுமன்ற பட்ஜெட் கூட்டத் தொடருக்குத் தயாராகும் வகையில், மத்திய பாதுகாப்பு அமைச்சர் ராஜ்நாத் சிங் தலைமையில் அனைத்துக் கட்சிக் கூட்டத்தை அரசு இன்று கூட்டியது. பல்வேறு அரசியல் கட்சிகளின் தலைவர்களுடன் கூட்டத்தை ஏற்பாடு செய்த நாடாளுமன்ற விவகாரங்கள் துறை அமைச்சர் கிரண் ரிஜிஜு, நாடாளுமன்ற அமர்வின் போது அவர்கள் பேசத் திட்டமிட்டுள்ள பிரச்சினைகள் குறித்து விவாதித்தார். அந்த சந்திப்பின் போது, ஜேடி(யு) தலைவர்கள் பீகாருக்கு சிறப்பு அந்தஸ்து வழங்க வேண்டும் என்றும், ஒய்எஸ்ஆர்சிபி ஆந்திராவிற்கு சிறப்பு அந்தஸ்து வழங்க வேண்டும் என்றும் கோரியதாக காங்கிரஸ் தலைவர் ஜெய்ராம் ரமேஷ் ட்வீட் செய்துள்ளார்.
பீகார் மற்றும் ஆந்திராவுக்கு சிறப்பு அந்தஸ்து வழங்க வேண்டும் என்று கோரிக்கை
இந்த விவகாரத்தில் தெலுங்கு தேசம் கட்சி தலைவர் மௌனம் காத்தது குறிப்பிடத்தக்கது. "பாதுகாப்பு அமைச்சர் ராஜ்நாத் சிங் தலைமையில் இன்று நடைபெற்ற அனைத்துக் கட்சித் தலைவர்கள் கூட்டத்தில், ஜே.டி. (யு) தலைவர் பீகாருக்கு சிறப்பு அந்தஸ்து கோரினார். ஒய்.எஸ்.ஆர்.சி.பி தலைவர் ஆந்திராவுக்கு சிறப்பு அந்தஸ்து கோரினார். வினோதமாக, தெலுங்கு தேசம் கட்சி தலைவர் அமைதியாக இருந்தார்." என்று ஜெய்ராம் ரமேஷ் ட்வீட் செய்துள்ளார். சமீபத்தில் மக்களவையில் துணைத் தலைவராக நியமிக்கப்பட்ட காங்கிரஸ் எம்பி கௌரவ் கோகோய், நீட் தேர்வு, ED மற்றும் CBI போன்ற மத்திய அமைப்புகளின் முறைகேடு குறித்து கவலைகளை எழுப்பி, துணை சபாநாயகர் பதவிக்கான கோரிக்கையை மீண்டும் வலியுறுத்தினார்.