மனப்பாடம் செய்து தேர்வெழுதும் முறைக்கு டாட்டா.. 2026 பொதுத்தேர்வு கேள்வித்தாள் அமைப்பில் பெரிய மாற்றம் செய்தது சிபிஎஸ்இ
செய்தி முன்னோட்டம்
மத்திய இடைநிலைக் கல்வி வாரியம் (சிபிஎஸ்இ), 2026 ஆம் ஆண்டுப் பொதுத்தேர்வுக்கான கேள்வித்தாள் அமைப்பில் ஒரு பெரிய மாற்றத்தை அறிவித்துள்ளது. மாணவர்களின் கவனம் மனப்பாடம் செய்தலிலிருந்து கருத்துப் புரிதலுக்கு (conceptual understanding) மாற வேண்டும் என்பதே இந்த மாற்றத்தின் முக்கிய நோக்கம் ஆகும். இதன்மூலம் மாணவர்கள் திறம்படப் பாடங்களைப் புரிந்துகொள்வதுடன், பகுப்பாய்வு மற்றும் சிக்கலைத் தீர்க்கும் திறன்களையும் மேம்படுத்திக் கொள்ள முடியும் என்று வாரியம் தெரிவித்துள்ளது. தேசியக் கல்விக் கொள்கை (NEP) 2020 பரிந்துரைகளுடன் சீரமைத்து, 10 மற்றும் 12ஆம் வகுப்புத் தேர்வுத் தாள் அமைப்பு மாற்றப்பட்டுள்ளது. 2026 முதல், கேள்வித்தாள்களில் 50 சதவீதம் வரை திறன் சார்ந்த (Competency-Based) கேள்விகள் இடம்பெறும்.
கொள்குறி வினாக்கள்
20 சதவீதம் கேள்விகள் கொள்குறி வினாக்கள் (MCQ)
திறன் சார்ந்த கேள்விகளில் 20 சதவீத கேள்விகள் கொள்குறி வினாக்களாக (MCQs), கேஸ் சார்ந்த கேள்விகள், தரவு விளக்கம் அல்லது சூழ்நிலை சார்ந்த சிக்கல்கள் போன்ற வடிவங்களில் இருக்கும். மீதமுள்ள 30 சதவீதம் கேள்விகள் விரிவான பதில் (Constructed-Response) வகையைச் (குறுகிய மற்றும் நீண்ட பதில்கள்) சேர்ந்ததாக இருக்கும். இந்த மாற்றத்தின் மூலம், தகவல் அறிவைச் சோதிப்பதற்குப் பதிலாக, மாணவர்கள் தாங்கள் கற்றதை நடைமுறையில் பயன்படுத்தும் திறனைச் சோதிக்கப்படும். மேலும், 10ஆம் வகுப்பு மாணவர்களுக்குத் தங்கள் கற்றல் விளைவுகளை வெளிப்படுத்த அதிக நெகிழ்வுத்தன்மை அளிக்கும் விதமாக, 2026 முதல் இரண்டு பொதுத் தேர்வுகள் நடத்தப்படும் என்றும் சிபிஎஸ்இ அறிவித்துள்ளது குறிப்பிடத்தக்கது.