எதிர்க்கட்சி ஒட்டுக்கேட்பு விவகாரம்: விளக்கமளிக்க இந்தியா வரும் ஆப்பிள் குழு
செய்தி முன்னோட்டம்
இந்தியாவில் உள்ள முக்கிய எதிர்க்கட்சி அரசியல் தலைவர்களின் ஐபோன்களை அரசுத் தரப்பு ஒட்டுக்கேட்க முயற்சி செய்வதாகக் கடந்த மாதம் அவர்களுக்கு ஐபோன்கள் மூலமாகவே எச்சரிக்கை செய்தி அனுப்பியிருந்தது அமெரிக்காவைச் சேர்ந்த தொழில்நுட்ப நிறுவனமான ஆப்பிள்.
இந்த பிரச்சினை இந்தியாவில் பல்வேறு தரப்பிலும் அதிர்சியையும் கண்டனங்களையும் எழுப்பியது. காங்கிரஸ் மட்டுமல்லாது, ஆம் ஆத்மி, சிபிஐ(எம்) உள்ளிட்ட பல்வேறு கட்சிகளைச் சேர்ந்த முக்கிய தலைவர்களின் ஐபோன்களுக்கும் எச்சரிக்கை செய்தியை அனுப்பியிருக்கிறது ஆப்பிள்.
ஆப்பிளின் இந்த நடவடிக்கை குறித்து இந்தியாவிற்கு வந்து விளக்கமளிக்கும்படி நோட்டீஸ் அனுப்பியிருக்கிறது, மத்திய மின்னணு மற்றும் தகவல் தொழில்நுட்ப அமைச்சகத்தின் கீழ் செயல்பட்டு வரும் கணினி மற்றும் இணையப் பிரச்சினைகளுக்கான பேரிடர் தடுப்புக் குழு (CERT-In).
ஆப்பிள்
இந்தியா வரும் ஆப்பிள் நிர்வாகிகள்:
CERT-In-ன் இந்த நோட்டீஸை முன்னிட்டு, ஆப்பிள் நிறுவனத்தின் சைபர் பாதுகாப்புக் குழுவைச் சேர்ந்த நிர்வாகிகள் இந்தியாவிற்கு வந்து CERT-In அமைப்பிடம் விளக்கமளிக்கக்கூடும் என எதிர்பார்க்கப்படுகிறது.
மேலும், அடுத்த சில நாட்களிலேயே ஆப்பிள் நிர்வாகிகள் குழு இந்தியாவை வந்தடையலாம் எனவும் எதிர்பார்க்கப்படுகிறது.
ஆப்பிள் நிறுவனமானது இந்திய வந்து தங்களது செயல்பாடுகளுக்கு பதிலளிக்க வேண்டும் என மின்னணு மற்றும் தகவல் தொழில்நுட்பத்துறை துணையமைச்சர் ராஜீவ் சந்திரசேகரும் சில நாட்களுக்கு முன்பு நடைபெற்ற செய்தியாளர்கள் சந்திப்பில் தெரிவித்திருக்கிறார்.
ஆப்பிள் விளக்கமளிப்பதற்கு கொடுக்கப்பட்டுள்ள கால அவகாசம் குறித்து கேட்கப்பட்டதற்கு, அதுகுறித்த முறையான தகவல்களை அவர் தெரிவிக்கவில்லை.