ஜம்மு காஷ்மீர் விவகாரம் தொடர்பாக அமித்ஷா தலைமையில் நடைபெற்றது ஒரு உயர்மட்ட கூட்டம்
ஜம்மு காஷ்மீரில் சமீபத்தில் நடந்த தீவிரவாத தாக்குதல்களை அடுத்து அங்கு பாதுகாப்பு நிலவரம் எப்படி இருக்கிறது என்பது குறித்து விவாதிக்க இன்று டெல்லியில் மத்திய உள்துறை அமைச்சர் அமித்ஷா தலைமையில் உயர்மட்டக் கூட்டம் நடைபெற்றது. இந்த சந்திப்பின் போது, பயங்கரவாத எதிர்ப்பு நடவடிக்கைகளை தீவிரப்படுத்த அமித்ஷா விரிவான வழிகாட்டுதல்களை வழங்குவார் என்று எதிர்பார்க்கப்படுகிறது. தேசிய பாதுகாப்பு ஆலோசகர் அஜித் தோவல், ஜம்மு காஷ்மீர் லெப்டினன்ட் கவர்னர் மனோஜ் சின்ஹா, ராணுவ தளபதி மனோஜ் பாண்டே, ராணுவ தளபதி உபேந்திர திவேதி, உள்துறை செயலாளர் அஜய் பல்லா, உளவுத்துறை இயக்குனர் தபன் டேகா, சிஆர்பிஎப் டைரக்டர் ஜெனரல் அனிஷ் தயாள், காவல்துறையின் இயக்குநர் ஜெனரல் ஆர்ஆர் ஸ்வைன் உள்ளிட்டோர் இந்த கூட்டத்தில் கலந்து கொண்டனர்.
வருடாந்திர அமர்நாத் யாத்திரை குறித்து விவாதம்
ஜூன் 29 ஆம் தேதி தொடங்க உள்ள வருடாந்திர அமர்நாத் யாத்திரைக்கான ஏற்பாடுகளையும் இந்த கூட்டத்தின் போது உள்துறை அமைச்சர் மதிப்பாய்வு செய்வார். ஜம்மு காஷ்மீரின் பாதுகாப்பு நிலவரம், சர்வதேச எல்லை மற்றும் எல்லைக் கட்டுப்பாட்டுக் கோடு பகுதியில் படைகள் குவிப்பு, ஊடுருவல் முயற்சிகள், தற்போது நடைபெற்று வரும் பயங்கரவாத எதிர்ப்பு நடவடிக்கைகளின் நிலை, ஜம்மு காஷ்மீரில் உள்ள பயங்கரவாதிகளின் பலம் ஆகியவை குறித்து அமித்ஷாவிடம் தெரிவிக்கப்படும் என்று தெரிகிறது. கடந்த வாரத்தில், ஜம்மு காஷ்மீரின் ரியாசி, கதுவா மற்றும் தோடா மாவட்டங்களில் நான்கு இடங்களில் பயங்கரவாதிகள் தாக்குதல் நடத்தியதால், ஒன்பது யாத்ரீகர்கள் மற்றும் ஒரு சிஆர்பிஎஃப் ஜவான் கொல்லப்பட்டனர். இதனால், ஏழு பாதுகாப்பு வீரர்கள் மற்றும் பலர் காயமடைந்தனர்.
