கடந்த ஒரு வாரத்தில் தமிழ்நாட்டில் 113 பேருக்கு டெங்கு பாதிப்பு - அதிர்ச்சி தகவல்
தமிழ்நாட்டில் கடந்த ஒரு வாரத்தில் மட்டும் 113 பேருக்கு டெங்கு காய்ச்சல் பாதிப்பு உறுதி செய்யப்பட்டுள்ளதாக மருத்துவத்துறை சார்பில் தகவல்கள் வெளியாகி பெரும் அதிர்ச்சியினை ஏற்படுத்தியுள்ளது. இம்மாதம் துவங்கி 13 நாட்களில் தமிழகத்தில் 204 பேருக்கு டெங்கு பாதிப்பு ஏற்பட்டதும் கண்டறியப்பட்டுள்ளது என்றும், சராசரியாக ஒருநாளைக்கு தமிழகத்தில் 15ல் இருந்து 20 பேருக்கு டெங்கு உறுதி செய்யப்பட்டு வருகிறது என்றும் தமிழக மருத்துவத்துறை கூறியுள்ளது. மதுரையில், 11 குழந்தைகள் உள்பட 37 பேருக்கு கடந்த ஒருவாரத்தில் டெங்கு காய்ச்சல் இருப்பதாக கூறப்படுகிறது. அதனை தொடர்ந்து, புதுக்கோட்டையில் 5 பேருக்கு டெங்கு பாதிப்பு உறுதி செய்யப்பட்டுள்ளது. டெங்கு பரவல் காரணமாக சுகாதாரப்பணிகள் தீவிரமாக மேற்கொள்ளப்பட்டுள்ளது என்று சுகாதாரத்துறை இயக்குனர் ஸ்ரீராமுலு கூறியுள்ளார்.
புதுச்சேரியில் 2 பேர் டெங்குவால் உயிரிழப்பு
இதனிடையே, புதுச்சேரியில் 2 பேர் டெங்கு மற்றும் மலேரியா இறந்துள்ளனர் என்றும் தகவல் வெளியாகி அச்சத்தினை அதிகரித்துள்ளது. அதன்படி, புதுச்சேரி குருமாம்பேட் வீட்டுவசதி வாரிய குடியிருப்பில் வசிக்கும் 17 வயது கல்லூரி மாணவியான காயத்ரி டெங்கு பாதிப்பால் மூலக்குளத்தில் உள்ள தனியார் மருத்துவமனையில் தீவிரச்சிகிச்சை பெற்றுவந்துள்ளார். இந்நிலையில் அவர் நேற்று(செப்.,13)சிகிச்சை பலனின்றி உயிரிழந்ததாக மருத்துவமனை சார்பில் கூறப்பட்டுள்ளது. அவரைத்தொடர்ந்து, டைபாய்டு காரணமாக புதுச்சேரி மேட்டுப்பாளையத்தினை சேர்ந்த மீனரோஷினி(28)கடந்த 4ம் தேதி தனியார் மருத்துவமனையில் அனுமதிக்கப்பட்டுள்ளார். அதன்பின்னர் ஜிப்மர் மருத்துவமனையில் அனுமதிக்கப்பட்டு தீவிர சிகிச்சை பெற்றுவந்த அவர் நேற்று திடீரென உயிரிழந்ததாகவும், அவருக்கு டெங்கு பாதிப்பும் இருந்துள்ளது என்றும் கூறப்படுகிறது. டெங்கு பாதிப்பால் தான் அவர் உயிரிழந்தார் என்று சுகாதாரத்துறை தரப்பில் கூறப்பட்டுள்ளது குறிப்பிடத்தக்கது.
