கும்பகோணம் அருகே கி.பி.10ம் நூற்றாண்டு கால தேவி சிலை கண்டெடுப்பு
செய்தி முன்னோட்டம்
கும்பகோணம் அருகேயுள்ள கோனேரிராஜபுரம் என்னும் பகுதியில் கி.பி.10ம் நூற்றாண்டினை சேர்ந்த மூத்த தேவி சிலை ஒன்று கண்டெடுக்கப்பட்டுள்ளது.
இதுகுறித்து வட்டார ஆய்வாளரும், கும்பகோணம் மாவட்ட வரலாற்று ஆய்வு சங்க உறுப்பினருமான ஆ.கோபிநாத் செய்தி குறிப்பு ஒன்றினை வெளியிட்டுள்ளார்.
அதில், கோனேரிராஜபுரம் திருநல்லம் பகுதியிலுள்ள வரலாற்று ஆய்வாளர் சு.சுவாமிநாதன், ஓய்வுபெற்ற கிராம நிர்வாக அலுவலரான நாராயணன் உள்ளிட்டோர் கொடுத்த தகவலின்பேரில் குறிப்பிட்ட இடத்தில் களஆய்வு மேற்கொள்ளப்பட்டது.
அதன்படி கோனேரிராஜபுரத்தின் வடக்கு தெருவில் வயல்வெளி பகுதியில் அமைந்துள்ள ஓர் வாய்க்காலில் கிடந்த கல் ஒன்று எடுக்கப்பட்டு சுத்தம் செய்து பார்த்ததில் அது மூத்த தேவி சிலை என்று கண்டறியப்பட்டது என்று குறிப்பிடப்பட்டுள்ளது.
கண்டெடுக்கப்பட்ட அமர்ந்து நிலையிலுள்ள மூத்த தேவியின் சிலை மார்புப்பகுதியில் சிதைவுற்றுள்ளது என்றும் கூறப்படுகிறது.
சிலை
வழக்கத்தில் இருந்த வழிபாடு - கல்வெட்டுகள் மூலம் உறுதி
மேலும், திருநல்லம் என்று அழைக்கப்படும் இந்த ஊரில் அமைந்துள்ள நடராஜர், உலகம் முழுவதும் பிரசித்திப்பெற்றவர்.
அக்கோயில் அமைந்துள்ள 1.5கிமீ.,தொலைவிலுள்ள வயல்வெளியில் இருந்துதான் இந்த சிலை எடுக்கப்பட்டுள்ளது என்றும் அதில் கூறப்பட்டுள்ளது.
சோழர் காலத்து சிலையான இது 3.50 அடி உயரமும், 2.50 அடி அகலமும் கொண்டு வடிவமைக்கப்பட்டுள்ளது.
இந்த சிலையில் உள்ள மூத்த தேவி வசீகரமான முகம், காதில் குழைகள் அணிந்ததோடு தலையில் மகுடம் கொண்டு கண்டிகை, சரப்பளி, சவுடி உள்ளிட்ட அணிகலன்கள் அணிந்து அழகாக காட்சியளிக்கிறார்.
இந்த சிலையில் தேவியுடன் மாந்தன் மற்றும் மாந்தி உள்ளிட்டோரும் காட்சியளிக்கின்றனர்.
பல்லவர்கள் மற்றும் சோழர்கள் காலத்தில் மூத்த தேவி வழிப்பாடு நடைமுறையில் இருந்தது என்பது கல்வெட்டுகள் மூலம் உறுதியாகிறது என்றும் கோபிநாத் தெரிவித்துள்ளார்.