ப. ரஞ்சித்தின் தங்கலான் படத்திற்காக 4 மணி நேரம் மேக்கப் போடும் விக்ரம்
விக்ரம் அடுத்ததாக நடித்துக் கொண்டிருக்கும் படம் 'தங்கலான்.' இந்த படத்தை பா. ரஞ்சித் இயக்கி வருகிறார். இப்படத்தில் விக்ரமுடன் மாளவிகா மேனன், பார்வதி மேனன், பசுபதி போன்றோர் முக்கிய கதாபாத்திரங்களில் நடித்து வருகின்றனர். இப்படத்தை ஸ்டூடியோ கிரீன் நிறுவனம் மற்றும் நீலம் புரொடக்ஷன்ஸ் இணைந்து தயாரித்து வருகிறது. இசையமைப்பாளர் ஜி.வி பிரகாஷ் இப்படத்திற்கு இசையமைக்கிறார் மற்றும் ஏ. கிஷோர் குமார் ஒளிப்பதிவு செய்கிறார். கோலார் தங்க வயலில் வேலை செய்த தமிழர்களின் அவலத்தை மையமாக கொண்டு இந்த படம் உருவாகி கொண்டு இருக்கிறது. எனவே இந்த படத்தின் பெரும்பகுதியின் படப்பிடிப்பு கோலார் தங்க வயல் பகுதியை மையப்படுத்தியே எடுக்கப்பட்டுள்ளது.
விக்ரம் கேரியரில் இது ஒரு முக்கிய படமாக இருக்கும் - பா. ரஞ்சித்
இப்படத்தின் டீசர் ஏற்கனவே வெளிவந்து ரசிகர்களை கவர்ந்துள்ளது. இதனை தொடர்ந்து தங்கலான் வார்த்தையின் அர்த்தத்தை ரசிகர்கள் கூகுளில் தேட தொடங்கியுள்ளனர். தங்கலான் என்றால் ஊர் காவலன் என்பது பொருளாகும். இப்படத்தில் விக்ரம் வித்தியாசமான கதாப்பாத்திரத்தில் நடித்து வருகிறார். பொதுவாகவே விக்ரம் கதாபாத்திரங்களுக்கு முக்கியத்துவம் கொடுத்து உடலை வருத்தி நடிப்பவர் என்ற பாராட்டுக்கு உரியவர். இந்நிலையில் இந்த படத்தின் இயக்குனரான பா.ரஞ்சித் அளித்துள்ள பேட்டியில் தங்கலான் படத்துக்காக விக்ரமிற்கு மேக்கப் போடுவதற்கு தினமும் 4 மணி நேரங்கள் எடுத்து கொள்ளப்படுகிறது என கூறியுள்ளார். மேலும் அந்த கதாபாத்திரத்தை உள்வாங்கி உணர்வுப் பூர்வமாக நடித்து வருகிறார். இது விக்ரம் கேரியரில் ஒரு முக்கிய படமாக இருக்கும் என அவர் தெரிவித்துள்ளார்.
