நடிகர் சங்க கட்டிடம் கட்ட ரூ.1 கோடி நிதி வழங்கினார் விஜய்
செய்தி முன்னோட்டம்
நடிகர் சங்க கூட்டத்திற்குப் பிறகு பேசிய நடிகர் கார்த்தி, நடிகர் சங்க கட்டிடத்தின் கட்டுமானப் பணிக்கு நடிகர் விஜய் ரூ.1 கோடி கொடுத்ததாக தெரிவித்தார்.
சென்னை தேனாம்பேட்டையில் உள்ள காமராஜர் அரங்கில் ஞாயிற்றுக்கிழமை (செப்டம்பர் 8) நடிகர் சங்க கூட்டம் நடைபெற்றது.
இந்த கூட்டத்தில் பங்கேற்க நடிகர் விஷால் சைக்கிளில் வந்தது பேசுபொருளானது. இதைத் தொடர்ந்து நடைபெற்ற கூட்டத்தில் பல்வேறு விஷயங்கள் குறித்து தீர்மானங்கள் இயற்றப்பட்டன.
நடிகர் சங்கத்தின் கட்டுமானப் பணிகள் நடந்து வரும் நிலையில், அதைத் தொய்வின்றி மேற்கொள்வதற்கு ஏதுவாக நடிகர் சங்கத்தின் நிர்வாகிகளின் பதவிக்காலத்தை மூன்று ஆண்டுகளுக்கு நீட்டிக்க இதில் தீர்மானம் நிறைவேற்றப்பட்டது.
நிதி
நடிகர் சங்க கட்டிடம் கட்டுவதற்கான நிதி
நடிகர் சங்க கட்டிடத்தை கட்டி முடிப்பதற்கான நிதியை கடனாக பெற வங்கியில் 50% தொகையை வைப்புத் தொகையாக வைக்க வேண்டும் எனக் கூறப்பட்டதால், அதை தயார் செய்வதற்கு நான்கு மாதம் ஆகிவிட்டதாக நடிகர் விஷால் தெரிவித்தார்.
இந்நிலையில், நடிகர் விஜய் நடிகர் சங்க கட்டிடத்தின் கட்டுமானப் பணிக்காக ரூ.1 கோடி கொடுத்தார் என நடிகர் கார்த்தி கூறினார்.
மேலும், நடிகர்கள் கமல்ஹாசன், தனுஷ், நெப்போலியன் மற்றும் நடிகராக இருந்து அமைச்சரான உதயநிதி ஸ்டாலின் உள்ளிட்டோரும் நிதி கொடுத்துள்ளதாக அவர் கூறினார்.
இதற்கிடையே, நடிகர் சங்க கட்டிடத்தின் கடனை அடைப்பதற்காக கலை நிகழ்ச்சி நடத்தவும் முடிவு செய்யப்பட்டுள்ளது.
அதில் ரஜினி மற்றும் கமல் இணைந்து ஒரு டிராமா நிகழ்ச்சியில் நடிக்க ஒப்புக் கொண்டுள்ளதாக கூறினார்.