வெனிசுலாவுடன் புதிய உறவு! அந்நாட்டின் புதிய இடைக்கால அதிபர் டெல்சி ரோட்ரிக்ஸுடன் பிரதமர் மோடி ஆலோசனை
செய்தி முன்னோட்டம்
பிரதமர் நரேந்திர மோடி வெள்ளிக்கிழமை (ஜனவரி 30) அன்று வெனிசுலாவின் புதிய இடைக்கால அதிபராகப் பொறுப்பேற்றுள்ள டெல்சி ரோட்ரிக்ஸ் உடன் தொலைபேசி வாயிலாக உரையாடினார். சமீபத்தில் வெனிசுலாவில் ஏற்பட்ட அரசியல் மாற்றங்களுக்குப் பிறகு, இரு நாட்டுத் தலைவர்களுக்கும் இடையே நடந்த முதல் அதிகாரப்பூர்வப் பேச்சுவார்த்தை இதுவாகும். இரு நாடுகளுக்கும் இடையிலான இருதரப்பு உறவுகளை புதிய உயரத்திற்கு கொண்டு செல்ல இரு தலைவர்களும் ஒப்புக்கொண்டுள்ளனர்.
மாற்றங்கள்
வெனிசுலாவில் நிகழ்ந்த அதிரடி மாற்றங்கள்
வெனிசுலாவின் அரசியல் சூழலில் கடந்த சில வாரங்களாகப் பெரும் கொந்தளிப்பு நிலவி வருகிறது. அமெரிக்க ராணுவத்தின் அதிரடி நடவடிக்கையால் முன்னாள் அதிபர் நிக்கோலஸ் மதுரோ மற்றும் அவரது மனைவி கைது செய்யப்பட்டனர். இதைத் தொடர்ந்து ஏற்பட்ட அரசியல் மாற்றங்களால், அந்நாட்டின் உச்ச நீதிமன்றம் டெல்சி ரோட்ரிக்ஸை இடைக்கால அதிபராக நியமித்தது. 56 வயதான தொழிலாளர் நல வழக்கறிஞரான டெல்சி ரோட்ரிக்ஸ், ஜனவரி 5 அன்று முறைப்படி பதவியேற்றார். அவருக்கு அவரது சகோதரரும் தேசிய சட்டமன்றத் தலைவருமான ஜார்ஜ் ரோட்ரிக்ஸ் பதவிப் பிரமாணம் செய்து வைத்தார். ஜனவரி 28 அன்று காரகாஸில் நடந்த ஒரு விழாவில், வெனிசுலாவின் ராணுவம் மற்றும் காவல்துறை அதிகாரப்பூர்வமாக அதிபர் டெல்சி ரோட்ரிக்ஸிற்குத் தங்கள் விசுவாசத்தை உறுதிப்படுத்தினர்.
பிரதமர் மோடி
பிரதமர் மோடியின் எக்ஸ் தள பதிவு
இந்த உரையாடல் குறித்து பிரதமர் மோடி தனது எக்ஸ் தள பக்கத்தில் பதிவிடுகையில், "வெனிசுலாவின் இடைக்கால அதிபர் டெல்சி ரோட்ரிக்ஸுடன் பேசினேன். அனைத்துத் துறைகளிலும் எங்களது இருதரப்பு கூட்டாண்மையை மேலும் ஆழப்படுத்தவும் விரிவுபடுத்தவும் நாங்கள் ஒப்புக்கொண்டோம். வரும் ஆண்டுகளில் இந்தியா-வெனிசுலா உறவுகளைப் புதிய உயரத்திற்கு எடுத்துச் செல்லும் பகிரப்பட்ட தொலைநோக்குப் பார்வை எங்களிடம் உள்ளது." என்று தெரிவித்துள்ளார்.
நிலைப்பாடு
இந்தியாவின் நிலைப்பாடு
வெனிசுலாவில் மதுரோ நீக்கப்பட்டபோது, இந்திய வெளியுறவு அமைச்சகம் கவலை தெரிவித்திருந்தது. அமைதியான முறையில் பேச்சுவார்த்தை மூலம் தீர்வு காணப்பட வேண்டும் என்றும், பிராந்தியத்தின் அமைதி மற்றும் ஸ்திரத்தன்மையை உறுதி செய்ய வேண்டும் என்றும் இந்தியா வலியுறுத்தியிருந்தது. தற்போது புதிய அரசாங்கத்துடன் உறவை மேம்படுத்துவதன் மூலம், எரிசக்தி மற்றும் வர்த்தகத் துறைகளில் இந்தியா தனது நலன்களைக் காக்க முயல்கிறது. குறிப்பாக, அமெரிக்காவுடனான வரி தொடர்பான சிக்கல்களுக்கு மத்தியில், வெனிசுலா போன்ற நாடுகளுடனான உறவு இந்தியாவுக்கு முக்கியமானதாகப் பார்க்கப்படுகிறது.