வெற்றிமாறனின் விடுதலை 2 டப்பிங் பணி தொடங்கியது
வெற்றிமாறன் இயக்கும் 'விடுதலை 2' படத்தின் டப்பிங் பணிகள் ஆரம்பிக்கப்பட்டதாக படக்குழு அறிவித்துள்ளது. 'விடுதலை 2' டிசம்பர் மாதம் திரைக்கு வரும் என ஏற்கனவே அறிவிக்கப்பட்டது குறிப்பிடத்தக்கது. 'விடுதலை' படத்தின் முதல் பாகம் கடந்த ஆண்டு மார்ச் 31-ஆம் தேதி வெளியானது. இதில் சூரி மற்றும் விஜய் சேதுபதி முக்கிய கதாபாத்திரங்களில் நடித்தனர். இவர்களோடு பவானி ஸ்ரீ, பிரகாஷ்ராஜ், கெளதம் வாசுதேவ் மேனன், ராஜீவ் மேனன், சேத்தன் உள்ளிட்ட பலர் நடித்திருந்தனர், இப்படத்திற்கு இசைஞானி இளையராஜா இசையமைத்திருந்தார். வேல்ராஜ் ஒளிப்பதிவு செய்த இந்த படம் ரசிகர்களிடையே நல்ல வரவேற்பு பெற்றது.
தாமதமான விடுதலை 2 பணிகள்
முதல் பாகம் வெளியான ஓரிரு மாதங்களிலேயே இரண்டாம் பாகம் வெளியாகும் என எதிர்பார்க்கப்பட்ட நிலையில், படத்தின் ஷூட்டிங் பணிகள் நீண்டு கொண்டே இருந்தது. இந்த நிலையில் தற்போது இரண்டாம் பாகத்தின் ஷூட்டிங் கிட்டத்தட்ட நிறைவடைந்துள்ளது. இப்போது, 'விடுதலை 2'-ன் போஸ்ட் ப்ரொடக்ஷன் பணிகள் தொடர்ந்து நடைபெற்று வருகின்றன. இரண்டாம் பக்கத்தில் விஜய் சேதுபதிக்கு ஜோடியாக மஞ்சு வாரியர் நடித்துள்ளார். 2-ஆம் பாகத்தில், விஜய் சேதுபதியின் வாத்தியார் கதாபாத்திரத்துக்கான பின்புலத்தை வெற்றிமாறன் முழுமையாக காட்சிப்படுத்தியுள்ளார். டிசம்பர் 20-ம் தேதி வெளியாக உள்ள நிலையில், அனைத்து பணிகளையும் விரைந்து முடிக்க திட்டமிடப்பட்டுள்ளது.
