இயக்குனர், நடிகர் மனோபாலா திடீர் மறைவு; திரையுலகம் அதிர்ச்சி
கோலிவுட்டின் பிரபல இயக்குனரும் நடிகருமான மனோபாலா, இன்று, மே 3, சென்னையில் காலமானார். இவருக்கு வயது 69. மனோபாலா, கடந்த இரண்டு வாரங்களாக கல்லீரல் தொடர்பான பிரச்சனை காரணமாக தனியார் மருத்துவமனையில் அனுமதிக்கப்பட்டுள்ளதாக கூறப்படுகிறது. இவர், சில மாதங்களுக்கு முன்னர், ஆஞ்சியோ செய்துகொண்டார் என்பதும் குறிப்பிடத்தக்கது. இயக்குனர் பாரதிராஜாவிடம், உதவி இயக்குனராக தனது திரைப்பயணத்தை தொடங்கியவர், இதுவரை நூற்றுக்கும் மேற்பட்ட படங்களில் நடித்துள்ளார். இவர் முதன்முதலில் இயக்கிய படம், 'ஆகாய கங்கை'. பல படங்களில் காமெடி கதாபாத்திரங்களில் நடித்து, எல்லோர் மனத்திலும் இடம்பிடித்த மனோபாலா கடைசியாக 'கோஸ்ட்டி' மற்றும் 'கொன்றால் பாவம்' ஆகிய படங்களில் நடித்திருந்தார். ஒரு தயாரிப்பாளராக, இவர் தயாரித்து, ஹெச்.வினோத் இயக்கிய படம் தான், சதுரங்கவேட்டை என்பதும் குறிப்பிடத்தக்கது.
