திரையரங்குகளில் ராமாயணா படத்தை வீடியோ எடுத்தால் சட்டப்படி நடவடிக்கை: படக்குழு எச்சரிக்கை
செய்தி முன்னோட்டம்
இயக்குநர் நிதேஷ் திவாரி இயக்கத்தில் ரன்பீர் கபூர், சாய் பல்லவி மற்றும் யாஷ் நடிப்பில் கடந்த நவம்பர் 5 அன்று வெளியான 'ராமாயணா: பாகம் 1' திரைப்படம் உலகளவில் மிகப்பெரிய வரவேற்பைப் பெற்று வசூல் சாதனை படைத்து வருகிறது. இந்நிலையில் திரையரங்குகளுக்குள் காட்சிகளை அனுமதியின்றி ரகசியமாக வீடியோ எடுத்து, அவற்றைச் சமூக வலைத்தளங்கள் மற்றும் செயலிகளில் பகிர்வது குறித்துப் படக்குழு அதிர்ச்சி தெரிவித்துள்ளது. இவ்வாறு சட்டவிரோதமாக படத்தை பதிவு செய்பவர்கள் மீது எந்தவித முன்னறிவிப்புமின்றி கடுமையான குற்றவியல் மற்றும் உரிமையியல் நடவடிக்கைகள் பாயும் எனத் தயாரிப்பு நிறுவனம் எச்சரித்துள்ளது.
சட்ட நடவடிக்கை
மும்பை உயர் நீதிமன்ற உத்தரவு
படக்குழு வெளியிட்டுள்ள அதிகாரப்பூர்வ எச்சரிக்கை அறிக்கையில், மும்பை உயர் நீதிமன்றம் பிறப்பித்துள்ள தடை உத்தரவு விரிவாகக் குறிப்பிடப்பட்டுள்ளது.
"திரைப்படத்தின் எந்தவொரு பகுதியையும் அனுமதியின்றிப் பதிவு செய்வதோ, பதிவேற்றுவதோ அல்லது பகிர்வதோ பதிப்புரிமைச் சட்டம், சினிமாட்டோகிராப் சட்டம், பாரதிய நியாய சன்ஹிதா (BNS) மற்றும் தகவல் தொழில்நுட்பச் சட்டங்களின் கீழ் தண்டனைக்குரிய குற்றமாகும்".
"இது நீதிமன்ற அவமதிப்பு செயலாகவும் கருதப்படும். இதுவரை பகிரப்பட்ட வீடியோக்களை உடனடியாக நீக்க வேண்டும். மீறுபவர்கள் மீது குற்றவியல் நடவடிக்கைகள் தொடரப்படும்" என்று தெரிவிக்கப்பட்டுள்ளது.
அடுத்த பாகம்
திரைப்படத்தின் நட்சத்திரப் பட்டாளம்
நமித் மல்ஹோத்ரா மற்றும் யாஷ் இணைந்து தயாரித்துள்ள இந்தப் பிரம்மாண்ட திரைப்படத்தில் ரகுல் ப்ரீத் சிங், காஜல் அகர்வால், அருண் கோவில் மற்றும் விவேக் ஓபராய் உள்ளிட்ட பலர் முக்கியக் கதாபாத்திரங்களில் நடித்துள்ளனர்.
முதல் பாகத்தின் இறுதியில் நடிகர் சன்னி தியோல் அனுமன் கதாபாத்திரத்தில் அறிமுகப்படுத்தப்பட்டுள்ள நிலையில், 'ராமாயணா: பாகம் 2' வருகிற 2028 தீபாவளி பண்டிகைக்கு வெளியாகவுள்ளது.
இந்தியாவில் விரைவில் 200 கோடி ரூபாய் வசூலைக் கடக்கவுள்ள சூழலில், திருட்டுத்தனமாகத் திரையரங்குகளில் வீடியோ எடுக்கும் நபர்கள் மீது மிகக் கடுமையான சட்ட நடவடிக்கைகள் பாயும் எனத் தயாரிப்பு நிறுவனம் தெரிவித்துள்ளது.