ஆஸ்காரில் அதிரடி மாற்றம்! இனி ஒரு நாடு இரண்டு படங்களை அனுப்பலாம் - நடிகர்களுக்குக் காத்திருக்கும் ஜாக்பாட்
செய்தி முன்னோட்டம்
உலகப் புகழ்பெற்ற ஆஸ்கார் விருது விழாவின் 99வது பதிப்பிற்கான அதிரடி விதிமுறை மாற்றங்களை அகாடமி அமைப்பு வெளியிட்டுள்ளது. 2027 ஆம் ஆண்டு நடைபெறவுள்ள இந்த விழாவில், சர்வதேச திரைப்படப் பிரிவு மற்றும் சிறந்த நடிப்புக்கான பிரிவுகளில் கொண்டு வரப்பட்டுள்ள மாற்றங்கள் உலகத் திரைத்துறையினரிடையே பெரும் வரவேற்பைப் பெற்றுள்ளன.
வரலாற்று மாற்றம்
சர்வதேச திரைப்படப் பிரிவில் வரலாற்று மாற்றம்
சிறந்த சர்வதேசத் திரைப்படப் பிரிவில் இதுவரை ஒரு நாடு ஒரு படத்தை மட்டுமே பரிந்துரைக்க முடியும் என்ற விதி இருந்தது. ஆனால், 2027 ஆம் ஆண்டு முதல் ஒரு நாடு இரண்டு படங்கள் வரை அதிகாரப்பூர்வமாகப் பரிந்துரைக்க அகாடமி அனுமதி அளித்துள்ளது. இதுதவிர, அந்தந்த நாடுகளின் தேர்வுக் குழுக்கள் தேர்வு செய்யாவிட்டாலும், கேன்ஸ், பெர்லின், வெனிஸ் போன்ற சர்வதேசத் திரைப்பட விழாக்களில் முக்கிய விருதுகளை வெல்லும் ஆங்கிலம் அல்லாத மொழிப் படங்கள் நேரடியாக ஆஸ்கார் போட்டிக்குத் தகுதி பெறும் புதிய முறையும் அறிமுகப்படுத்தப்பட்டுள்ளது.
புதிய முறை
இயக்குநர்களுக்கான அங்கீகாரம் மற்றும் புதிய முறை
சர்வதேசத் திரைப்படப் பிரிவில் மற்றொரு முக்கியமான மாற்றமாக, இனி விருது என்பது குறிப்பிட்ட நாட்டிற்கு வழங்கப்படாமல் நேரடியாகத் திரைப்படத்திற்கே வழங்கப்படும். இந்த விருதினை அந்தப் படத்தின் இயக்குநர் பெற்றுக் கொள்வார் என்பதோடு, ஆஸ்கார் சிலையில் படத்தின் பெயருடன் இயக்குநரின் பெயரும் பொறிக்கப்படும். இதன் மூலம் ஒரு படைப்புக்கான முழுமையான அங்கீகாரம் அதன் படைப்பாளிக்குச் சென்றடைவது உறுதி செய்யப்பட்டுள்ளது.
நடிப்பு
நடிப்புப் பிரிவில் இரட்டை வாய்ப்புகள்
நடிப்புப் பிரிவில் கொண்டு வரப்பட்டுள்ள மாற்றம் நடிகர்களுக்குப் பெரும் ஜாக்பாட் ஆக அமைந்துள்ளது. ஒரே ஆண்டில் ஒரு நடிகர் அல்லது நடிகை இரண்டு வெவ்வேறு படங்களில் சிறப்பான நடிப்பை வெளிப்படுத்தியிருந்தால், அவர் ஒரே பிரிவில் இரண்டு பரிந்துரைகளைப் பெற இனி அனுமதி உண்டு. இறுதி வாக்கெடுப்பில் இரண்டு கதாபாத்திரங்களும் முதல் ஐந்து இடங்களுக்குள் வந்தால், ஒரே நடிகர் ஒரே பிரிவில் இரண்டு முறை பரிந்துரைக்கப்படலாம்.
வாக்களிப்பு
தொழில்நுட்பக் கலைஞர்கள் மற்றும் வாக்களிப்பு விதிகள்
திரைப்படத் தயாரிப்பில் தொழில்நுட்பக் கலைஞர்களுக்கான அங்கீகாரமும் அதிகரிக்கப்பட்டுள்ளது. காஸ்டிங் பிரிவில் இனி இரண்டுக்குப் பதிலாக மூன்று சிலைகள் வரை வழங்க அனுமதி அளிக்கப்பட்டுள்ளது. ஒளிப்பதிவுத் துறையில் ஆரம்பகட்ட வாக்கெடுப்பிற்கு 20 படங்கள் கொண்ட நிலையான பட்டியல் உருவாக்கப்படும். மேக்கப் மற்றும் சிகை அலங்காரப் பிரிவு உறுப்பினர்கள் இறுதிப் பரிந்துரைக்கு வாக்களிக்க வேண்டுமானால், குறைந்தது ஒரு கலந்துரையாடல் அமர்விலாவது பங்கேற்பது கட்டாயமாக்கப்பட்டுள்ளது.
ஏஐ பயன்பாடு
ஏஐ பயன்பாடு மற்றும் எதிர்காலத் திட்டங்கள்
சினிமா துறையில் வளர்ந்து வரும் ஏஐ தொழில்நுட்பத்தின் தாக்கத்தைக் கருத்தில் கொண்டு, திரைப்படங்களில் ஏஐயின் பங்களிப்பு எவ்வளவு என்பது குறித்த விவரங்களைக் கோர அகாடமிக்கு உரிமை வழங்கப்பட்டுள்ளது. ஒரு படைப்பில் மனித உழைப்பு எவ்வளவு இருக்கிறது என்பதை உறுதி செய்ய இந்த நடவடிக்கை எடுக்கப்பட்டுள்ளது. 99வது ஆஸ்கார் விருது விழா 2027 ஆம் ஆண்டு மார்ச் 14 அன்று நடைபெறவுள்ளது. இதற்கான பரிந்துரைகள் 2027 ஜனவரி 21 அன்று முறைப்படி அறிவிக்கப்படும்.