'லியோ' படத்தின் அடுத்த அப்டேட் - புஸ்ஸி ஆனந்த்
செய்தி முன்னோட்டம்
லோகேஷ் கனகராஜ் இயக்கத்தில் நடிகர் விஜய் நடித்து வரும் படம் 'லியோ'. இப்படத்தில் விஜய்க்கு ஜோடியாக நடிகை த்ரிஷா நடிக்கிறார், அனிருத் ரவிச்சந்தர் இசையமைக்கிறார். செவன் ஸ்க்ரீன் ஸ்டுடியோஸ் தயாரிக்கும் இப்படத்தில் அர்ஜுன், சஞ்சய் தத், பிரியா ஆனந்த், மன்சூர் அலிகான், மிஷ்கின், கவுதம் வாசுதேவ் மேனன், சாண்டி, மேத்யூ தாமஸ் உள்ளிட்ட முக்கியமானோர் நடித்துள்ளனர். வரும் அக்டோபர் மாதம் இப்படம் வெளியாகும் என்று எதிர்பார்க்கப்படுகிறது. இப்படம் ரிலீஸிற்கு முன்னரே ஓடிடி, விநியோக உரிமம், இசை உரிமம் என ரூ.400 கோடி வசூலினை எட்டியுள்ளது என்று கூறப்படுகிறது. இதனிடையே முன்னதாக இப்படத்தின் இசை வெளியீட்டு விழா செப்டம்பர் மாதத்தில் மதுரையில் நடக்கும் என்று கூறப்பட்டது.
இசை
அனுமதி சீட்டுகளை மாவட்ட நிர்வாகிகளிடம் பெற்றுக்கொள்ளலாம்
அதன் பின்னர் இப்படத்தின் இசை வெளியீட்டு விழாவானது சிங்கப்பூர், மலேசியா போன்ற நாடுகளில் மிக பிரம்மாண்டமாக நடத்தப்படவுள்ளது என்று அறிவிக்கப்பட்டது. இந்நிலையில், இப்படத்தின் இசை வெளியீட்டு விழா குறித்த புதிய அப்டேட்டினை விஜய் மக்கள் இயக்க தலைவர் புஸ்ஸி ஆனந்த் அண்மையில் கூறியுள்ளார். அவர் கூறியதாவது, "இம்மாதம் 23ம் தேதியன்று இப்படத்தின் இசை வெளியீட்டு விழா சென்னை நேரு உள்விளையாட்டு அரங்கில் நடக்கவுள்ளது" என்றும், "அதற்கான அனுமதி சீட்டுகள் மாவட்ட நிர்வாகிகளிடம் வாங்கி கொள்ளலாம்" என்றும் தெரிவித்துள்ளார். விஜய் மக்கள் இயக்க மகளிர் அணி ஆலோசனை கூட்டம் அண்மையில் நடந்தது. அந்த ஆலோசனை கூட்டம் முடிந்து வெளியில் வந்த புஸ்ஸி ஆனந்த் இது குறித்த தகவலினை அளித்துள்ளார் என்பது குறிப்பிடத்தக்கது.