தொடர் தோல்வி; மார்க்கெட் இழக்கும் நிவின் பாலி
மலையாள திரையுலகம் மட்டுமின்றி, தமிழ் ரசிகர்களுக்கு பிடித்தமான ஒரு நடிகர் தான் நிவின் பாலி. தொழில்நுட்ப நிறுவனத்தில், பெரும் சம்பளத்திற்கு வேலையில் இருந்த நிவின், நடிப்பு மீதிருந்த ஆர்வத்தால், அதை உதறி விட்டு, சினிமாவிற்குள் நுழைந்தார். 'மலர்வாடி ஆர்ட்ஸ் கிளப்' என்ற திரைப்படம் மூலமாக திரையுலகில் காலடி எடுத்து வைத்தார். அவரின் நடிப்பு பலருக்கும் பிடித்து போகவே, அவருக்கென தனி ரசிகர் பட்டாளம் உருவானது. ரசிகைகள் மட்டுமின்றி, ரசிகர்களும் அவருக்கு ஏராளம். அதன்பின்னர், அல்போன்ஸ் புத்திரன் இயக்கத்தில், 'நேரம்' என்ற படத்தின் மூலம் தமிழ் ரசிகர்களுக்கு பரிச்சயமானார். 'நேரம்' படத்திற்கு பிறகு, அவர் அடுத்ததாக 'ப்ரேமம்' திரைப்படம் மூலமாக இந்தியா முழுவதும் பிரபலமானார்.
தொடர்ச்சியாக தோல்வி படங்கள்
மிகையில்லாத நடிப்பும், பக்கத்துக்கு வீட்டு பையன் போன்ற தோற்றமும் அவரை ரசிக்க வைத்தது. தொடர்ந்து வித்தியாசமான படங்களை தேர்வு செய்யும் முயற்சியாக, 'ஹே ஜூட்' என்ற படத்திற்காக உடல் எடையை கூட்டினார். ஆனால் படம் எதிர்பார்த்த அளவிற்கு ஓடவில்லை. அதன் பின்னர், அவரால் எடையை குறைக்க முடியவில்லை. இருந்தும் அதே எடையுடன் ஓரிரு படங்களில் நடிக்க அவையும் தோல்வியடைந்தன. தன்னுடைய எடை தான் காரணமாக இருக்குமோ என தற்போது முயற்சி செய்து எடையை குறைத்து, 'ராமசந்திரன் பாஸ் அண்ட் கோ' என்று படத்தில் நடித்துள்ளார். ஆனால், அதுவும் எதிர்பார்த்த வரவேற்பை பெறவில்லை. இப்படி தொடர்ச்சியாக தோல்வி படங்களை தருவதால், அவரின் ரசிகர் ஏமாற்றமடைந்துள்ளனர்
