கோவா சர்வதேச திரைப்பட விழா: மறைந்த இயக்குநர்கள் பாரதிராஜா, பாக்யராஜுக்கு சிறப்பு அஞ்சலி
செய்தி முன்னோட்டம்
கோவாவில் நடைபெறவுள்ள இந்திய சர்வதேச திரைப்பட விழாவில், கடந்த ஜூன் மாதம் அடுத்தடுத்து காலமான தமிழ் சினிமாவின் இருபெரும் ஜாம்பவான்களான இயக்குநர்கள் பாரதிராஜா மற்றும் கே. பாக்யராஜ் ஆகியோருக்குச் சிறப்பு அஞ்சலி செலுத்தும் விதமாக அவர்களின் காவியத் திரைப்படங்கள் திரையிடப்பட உள்ளன. இதற்கிடையே, இத்திரைப்பட விழாவின் மதிப்புமிக்க இந்தியன் பனோரமா பிரிவில் ராதிகா சரத்குமார் நடித்த தாய்கிழவி மற்றும் சுயாதீனத் திரைப்படமான ஸ்க்ரோல் ஆகிய இரு தமிழ் படங்களும், நியூ ஹொரைசன்ஸ் பிரிவில் அறிவு திரைப்படமும் அதிகாரப்பூர்வமாகத் தேர்வாகியுள்ளன.
கௌரவம்
பாரதிராஜா பாக்யராஜ் காவியப் படங்கள்
தமிழ் சினிமாவின் போக்கை மாற்றியமைத்த இயக்குநர் இமயம் பாரதிராஜா மற்றும் திரைக்கதை மன்னன் கே. பாக்யராஜ் ஆகியோர் கடந்த ஜூன் மாதம் சில வார இடைவெளியில் அடுத்தடுத்து மறைந்தது திரையுலகை மீளாத் துயரத்தில் ஆழ்த்தியது.
அவர்களின் கலைப் பங்களிப்பைக் கௌரவிக்கும் வகையில், 57-வது கோவா சர்வதேச திரைப்பட விழாவில் சிறப்பு அஞ்சலிப் பிரிவு ஏற்பாடு செய்யப்பட்டுள்ளது.
இதில் பாரதிராஜாவின் இயக்கத்தில் வெளியாகி தேசிய விருதுகளைக் குவித்த முதல் மரியாதை திரைப்படமும், கே. பாக்யராஜ் இயக்கி நடித்து 1983-ஆம் ஆண்டு மெகா ஹிட்டான 'முந்தானை முடிச்சு' திரைப்படமும் திரையிடப்பட்டு இரு ஆளுமைகளுக்கும் புகழஞ்சலி செலுத்தப்பட உள்ளது.
தேர்வு
சர்வதேச விழாவில் தமிழ் படங்கள்
நடப்பு ஆண்டு கோவா திரைப்பட விழாவிற்குத் தமிழ் சினிமாவிலிருந்து வழக்கமாக 20-க்கும் மேற்பட்ட திரைப்படங்கள் விண்ணப்பிக்கப்படும் நிலையில், இந்த முறை வெறும் 8 படங்கள் மட்டுமே அனுப்பப்பட்டிருந்தது விழா ஏற்பாட்டாளர்களுக்கே வியப்பை ஏற்படுத்தியிருந்தது.
இருப்பினும், அவற்றில் சிவகுமார் முருகேசன் இயக்கத்தில் ராதிகா சரத்குமார் நடித்த தாய்கிழவி மற்றும் செல்போன் திரைகளை மையப்படுத்தி கண்ணன் எஸ். இயக்கியுள்ள சுயாதீனப் படமான ஸ்க்ரோல் ஆகியவை இந்தியன் பனோரமா பிரிவிற்குத் தேர்வாகியுள்ளன.
மேலும், சத்யசிவா இயக்கத்தில் உறியடி விஜய் குமார், கயல் ஆனந்தி நடித்துள்ள சமூக அக்கறை கொண்ட அறிவு திரைப்படம் நியூ ஹொரைசன்ஸ் பிரிவில் திரையிடத் தேர்வாகித் தமிழ் சினிமாவிற்குப் பெருமை சேர்த்துள்ளது.