வதந்திகளுக்கு முற்றுப்புள்ளி! அல்லு அர்ஜுன் - லோகேஷ் கனகராஜ் படத்தின் படப்பிடிப்பு விரைவில் தொடக்கம்
செய்தி முன்னோட்டம்
அல்லு அர்ஜுன் - லோகேஷ் கனகராஜ் இணையும் புதிய திரைப்படம் கைவிடப்படுவதாக இணையத்தில் பரவிய தகவல்கள் முற்றிலும் ஆதாரமற்றவை எனத் தெரியவந்துள்ளது. இறுதிக்கட்ட திரைக்கதையில் அல்லு அர்ஜுனுக்குத் திருப்தி இல்லாததால் இப்படம் கைவிடப்பட்டதாகச் சமூக வலைதளங்களில் வதந்திகள் பரவி ரசிகர்களிடையே பெரும் கலக்கத்தை ஏற்படுத்தியிருந்தன. இவ்விவகாரம் தொடர்பாக அல்லு அர்ஜுன் தரப்பு அளித்த விளக்கத்தில், இச்செய்திகள் அடிப்படை ஆதாரமற்றவை என்றும், ரசிகர்கள் வதந்திகளை நம்பி ஏமாற வேண்டாம் என்றும் கேட்டுக்கொண்டனர். மேலும், இயக்குநர் லோகேஷ் கனகராஜுடன் திட்டமிட்டபடி இக்கூட்டணி உறுதியாக இணைகிறது என்பதும் அதிகாரப்பூர்வமாகத் தெளிவுபடுத்தப்பட்டுள்ளது.
மைத்ரி மூவி மேக்கர்ஸ்
ராக்கா படத்தைத் தொடர்ந்து படப்பிடிப்பு தொடக்கம்
இயக்குநர் அட்லீ இயக்கத்தில் அல்லு அர்ஜுன் நடித்துவரும் ராக்கா திரைப்படத்தின் படப்பிடிப்பு தற்போது இறுதிக்கட்டத்தை எட்டியுள்ளது.
அப்படத்தின் பணிகள் முழுமையாக நிறைவடைந்தவுடன், அல்லு அர்ஜுன் அடுத்ததாக லோகேஷ் கனகராஜ் இயக்கும் புதிய படத்திற்கான படப்பிடிப்பில் நேரடியாக இணையத் தயாராகி வருகிறார்.
தெலுங்கு திரையுலகின் முன்னணி தயாரிப்பு நிறுவனமான மைத்ரி மூவி மேக்கர்ஸ் நிறுவனம் இப்படத்தைப் பிரம்மாண்ட பொருட்செலவில் தயாரிக்கிறது.
மேலும், இளம் தலைமுறை இசையமைப்பாளரான சாய் அபயங்கர் இப்படத்திற்கு இசையமைக்க ஒப்பந்தமாகியுள்ளார்.
ஆக்ஷன் அதிரடி பாணியில் லோகேஷ் கனகராஜ் - அல்லு அர்ஜுன் இணையும் இப்புதிய படைப்பு இந்திய சினிமா ரசிகர்களிடையே இப்போதே பெரும் எதிர்பார்ப்பை எகிற வைத்துள்ளது.