பிரபல நகைச்சுவை நடிகர் சேசு காலமானார்
விஜய் டிவியின் காமெடி தொடரான லொள்ளு சபா மூலம் புகழ் பெற்ற நகைச்சுவை நடிகர் சேசு, இன்று தனது 60வது வயதில் காலமானார். மாரடைப்பால் கடந்த 10 நாட்களாக சென்னை மருத்துவமனையில் அனுமதிக்கப்பட்டு சிகிச்சை பெற்று வந்த அவரது இதயத்தில் மூன்று அடைப்புகள் கண்டறியப்பட்டன. இந்தியன் எக்ஸ்பிரஸ்ஸிடம் பேசிய லொள்ளு சபாவின் இயக்குனர் ராம் பாலா இந்த செய்தியை உறுதிப்படுத்தியதோடு, "இது என் குடும்பத்தில் ஒரு மரணம் போன்றது. சமீபத்தில் லொள்ளு சபாவின் அனைத்து நடிகர்களையும் மீண்டும் விஜய் பார்க்கில் கூட்டினார் சேசு. கடந்த 20 வருடங்களாக நாங்கள் தொடர்பில்லாமல் இருந்ததால், சேசு எங்களை ஒன்றாக இணைத்தார். இப்போது, அவர் போய்விட்டார்." என்று தெரிவித்துள்ளார்.
நடிகர் சேசுவின் திரைப்பயணம்
2002ஆம் ஆண்டில் வெளியான தனுஷ் திரைப்படமான துள்ளுவதோ இளமை திரைப்படத்தின் மூலம் வெள்ளித்திரையில் அறிமுகமான சேசு, வெற்றி பெற்ற விஜய் டிவி நகைச்சுவை நிகழ்ச்சியான லொள்ளு சபாவின் மூலம் பிரபலம் அடைந்தார். சேசு பின்னர் பல படங்களில் நடித்தார். இவர் நடிகர் சந்தானத்துடன் பல படங்களில் நடித்துள்ளார் என்பது குறிப்பிடத்தக்கது. ஏ1, டிக்கிலோனா, குலு குலு, நாய் சேகர் ரிட்டர்ன்ஸ், திரௌபதி, வடக்குப்பட்டி ராமசாமி மற்றும் 80களின் பில்டப் ஆகியவை அவர் நடித்த குறிப்பிடத்தக்க படங்களாகும். 2020 இல், சேசு தனது மகன் அபிலாஷின் குறும்படமான அரோராவில் நடித்திருந்தார். அவரது மறைவுச் செய்தி வெளியானதில் இருந்து, ரசிகர்கள் மற்றும் தொழில்துறை சகாக்கள் சமூக ஊடகங்களில் தங்கள் இரங்கலைத் தெரிவித்து வருகின்றனர்.
