வெளிநாட்டு தொழில்நுட்ப பணியாளர்கள் கூடாது, அமெரிக்கர்கள் மீதே கவனம் செலுத்த வேண்டும்: கூகிள், மைக்ரோசாப்ட் நிறுவனங்களுக்கு டிரம்ப் எச்சரிக்கை
செய்தி முன்னோட்டம்
கூகிள் மற்றும் மைக்ரோசாப்ட் போன்ற பெரிய தொழில்நுட்ப நிறுவனங்கள், இந்தியா, சீனா போன்ற நாடுகள் உட்பட வெளிநாடுகளில் பணியமர்த்துவதை நிறுத்துமாறு அமெரிக்க அதிபர் டொனால்ட் டிரம்ப் எச்சரித்துள்ளார். புதன்கிழமை வாஷிங்டனில் நடைபெற்ற ஒரு AI உச்சி மாநாட்டில், அமெரிக்க நிறுவனங்கள் இப்போது சீனாவில் தொழிற்சாலைகளை கட்டுவதை விட அல்லது இந்திய தொழில்நுட்ப ஊழியர்களுக்கு வேலைகளை வழங்குவதை விட உள்நாட்டில் வேலைவாய்ப்புகளை உருவாக்குவதில் அதிக கவனம் செலுத்த வேண்டும் என்று டிரம்ப் கூறினார். இந்த நிகழ்வில் பேசிய டிரம்ப், தொழில்நுட்பத் துறையின் "உலகமயமாக்கல் மனநிலை" என்று விமர்சித்து, இந்த அணுகுமுறை பல அமெரிக்கர்களை புறக்கணிக்கும் உணர்வை ஏற்படுத்தியுள்ளது என்றார்.
ஜனாதிபதி டிரம்ப்
"ஜனாதிபதி டிரம்பின் கீழ் அது கூடாது" என எச்சரிக்கை
சில சிறந்த தொழில்நுட்ப நிறுவனங்கள் அமெரிக்க சுதந்திரத்தைப் பயன்படுத்தி லாபம் ஈட்டியுள்ளன, ஆனால் நாட்டிற்கு வெளியே அதிக முதலீடு செய்துள்ளன என்றும் அவர் கூறினார். ஆனால், "ஜனாதிபதி டிரம்பின் கீழ், அந்த நாட்கள் முடிந்துவிட்டன," என்று அவர் குறிப்பிட தவறவில்லை. "நமது மிகப்பெரிய தொழில்நுட்ப நிறுவனங்கள் பல, சீனாவில் தங்கள் தொழிற்சாலைகளைக் கட்டியெழுப்பி, இந்தியாவில் தொழிலாளர்களை வேலைக்கு அமர்த்தி, அயர்லாந்தில் லாபத்தை குவித்து, அமெரிக்க சுதந்திரத்தின் ஆசீர்வாதங்களை அறுவடை செய்துள்ளன என்பது உங்களுக்குத் தெரியும். அதே நேரத்தில், தங்கள் சக குடிமக்களை இங்கேயே உள்நாட்டிலேயே பணிநீக்கம் செய்து தணிக்கை செய்கின்றன. ஜனாதிபதி டிரம்பின் கீழ், அந்த நாட்கள் முடிந்துவிட்டன," என்று அவர் கூறினார்.