எஸ்பிஐ வாடிக்கையாளர்களுக்கு முக்கிய எச்சரிக்கை! தொடர்ந்து 5 நாட்கள் வங்கி சேவைகள் பாதிக்கப்படும் அபாயம்!
செய்தி முன்னோட்டம்
பாரத ஸ்டேட் வங்கி (எஸ்பிஐ) வாடிக்கையாளர்கள் தங்களின் முக்கிய வங்கிப் பணிகளை முன்கூட்டியே திட்டமிட்டுக் கொள்வது இப்போது அவசியமாகியுள்ளது. அகில இந்திய எஸ்பிஐ ஊழியர்கள் கூட்டமைப்பு (AISBISF) மே 25 மற்றும் 26 ஆகிய தேதிகளில் இரண்டு நாட்கள் தொடர் வேலைநிறுத்தப் போராட்டத்திற்கு அதிகாரப்பூர்வமாக அழைப்பு விடுத்துள்ளது. வங்கி நிர்வாகத்துடன் நீண்ட நாட்களாக நிலுவையில் உள்ள பல்வேறு கோரிக்கைகளை வலியுறுத்தி இந்தத் தேசிய அளவிலான போராட்டம் நடத்தப்பட உள்ளதாக தொழிற்சங்கம் அறிவித்துள்ளது.
ஐந்து நாட்கள்
தொடர்ந்து ஐந்து நாட்கள் வங்கிச் சேவைகள் முடங்கும் அபாயம்
இந்த இரண்டு நாள் வேலைநிறுத்தம் காரணமாக நாட்டின் மிகப்பெரிய பொதுத்துறை வங்கியான எஸ்பிஐ கணக்குதாரர்கள் பெரும் சிரமங்களைச் சந்திக்க நேரிடலாம். மே 23 சனிக்கிழமை நான்காவது சனிக்கிழமை விடுமுறையாகவும், மே 24 ஞாயிற்றுக்கிழமை வாராந்திர விடுமுறையாகவும் அமைகிறது. அதன் தொடர்ச்சியாக திங்கள் மற்றும் செவ்வாய்க்கிழமைகளில் வேலைநிறுத்தமும், மே 27 புதன்கிழமை பக்ரீத் பண்டிகை விடுமுறையும் வருவதால் மொத்தம் ஐந்து நாட்கள் சேவைகள் பாதிக்கப்படும்.
முக்கிய கோரிக்கைகள்
தொழிற்சங்கம் முன்வைக்கும் முக்கிய கோரிக்கைகளின் பின்னணி
நிரந்தரப் பணியிடங்களை வெளிப்படைத் தரம் இல்லாமல் அவுட்சோர்சிங் செய்வதை உடனடியாக நிறுத்த வேண்டும் என்பதே ஊழியர்களின் முதன்மைக் கோரிக்கையாக உள்ளது. இதன் மூலம் வாடிக்கையாளர்களின் தனிப்பட்ட தரவுகள் கசிவதற்கும் மற்றும் நிதி மோசடிகள் நடப்பதற்கும் அதிக வாய்ப்புகள் உள்ளதாக அவர்கள் எச்சரிக்கின்றனர். மேலும் காலியாக உள்ள மெசஞ்சர் மற்றும் ஆயுதமேந்திய காவலர் பணியிடங்களை உடனடியாக நிரப்ப வேண்டும் என்றும் புதிய ஓய்வூதியத் திட்டத்தில் மாற்றங்களைச் செய்ய வேண்டும் என்றும் வலியுறுத்துகின்றனர்.
மாற்று வழிகள்
மாற்று வழிகளைப் பயன்படுத்த எஸ்பிஐ நிர்வாகம் அறிவுறுத்தல்
வங்கி கிளைகளில் அத்தியாவசிய சேவைகளை வழங்கத் தேவையான அனைத்து முயற்சிகளையும் மேற்கொண்டு வருவதாக எஸ்பிஐ நிர்வாகம் சமூக ஊடகங்களில் தெரிவித்துள்ளது. எனினும் வாடிக்கையாளர்கள் தங்களின் அவசரப் பணப் தேவைகளுக்கு ஏடிஎம் மற்றும் கணினி மயமாக்கப்பட்ட டெபாசிட் இயந்திரங்களைப் பயன்படுத்துமாறு கேட்டுக் கொள்ளப்பட்டுள்ளனர். டிஜிட்டல் பரிவர்த்தனைகளான யோனோ செயலி, இன்டர்நெட் பேங்கிங் மற்றும் யுபிஐ சேவைகளைப் முன்னுரிமை கொடுத்துப் பயன்படுத்துமாறும் வங்கி நிர்வாகம் அறிவுறுத்தியுள்ளது.