இண்டிகோ விமான சேவையில் குளறுபடி: டிசம்பரில் மட்டும் 16 லட்சம் பயணிகள் அவதி, ₹22.7 கோடி நஷ்டஈடு

எழுதியவர் Venkatalakshmi V

Feb 06, 2026

06:07 pm

செய்தி முன்னோட்டம்

கடந்த டிசம்பர் மாதம் இண்டிகோ (IndiGo) விமான நிறுவனத்தின் சேவைகள் பெருமளவில் பாதிக்கப்பட்டதில், சுமார் 16.2 லட்சம் உள்நாட்டுப் பயணிகள் விமான நிலையங்களில் தவித்ததாக விமானப் போக்குவரத்து ஒழுங்குமுறை ஆணையமான டிஜிசிஏ (DGCA) தெரிவித்துள்ளது. போதுமான விமானங்கள் மற்றும் ஊழியர்கள் இல்லாததே இந்த முடக்கத்திற்கு காரணம் எனக் கூறப்படுகிறது. இதனால் ஏற்பட்ட பாதிப்புகளை சரிசெய்ய இண்டிகோ நிறுவனம் சுமார் ₹22.7 கோடி செலவிட்டுள்ள நிலையில், வரும் பிப்ரவரி மாதம் முதல் புதிய விதிமுறைகள் அமலுக்கு வரவுள்ளதால் இத்துறை மேலும் சவால்களைச் சந்திக்கக்கூடும் என நிபுணர்கள் எச்சரிக்கின்றனர். தற்போது அந்தப் பாதிப்பின் தீவிரத்தை டிஜிசிஏ புள்ளிவிவரங்களுடன் உறுதிப்படுத்தியுள்ளது.

பாதிப்பு

கோடிக்கணக்கான பயணிகள் பாதிப்பு

டிஜிசிஏ தரவுகளின்படி, கடந்த டிசம்பரில் மட்டும் 9.8 லட்சம் பயணிகள் விமான ரத்து காரணமாகவும், 6.4 லட்சம் பயணிகள் இரண்டு மணி நேரத்திற்கும் மேலான தாமதம் காரணமாகவும் பாதிக்கப்பட்டனர். இண்டிகோ மட்டுமின்றி, ஏர் இந்தியா மற்றும் ஏர் இந்தியா எக்ஸ்பிரஸ் நிறுவனங்களின் சுமார் 1.6 லட்சம் பயணிகளும் இதே போன்ற தாமதங்களைச் சந்தித்துள்ளனர். பாதிக்கப்பட்ட பயணிகளுக்கு மாற்று ஏற்பாடுகள் மற்றும் கட்டணத்தை திருப்பி வழங்க இண்டிகோ நிறுவனம் ₹22.7 கோடியை செலவிட்டுள்ளது.

சவால்

ஊழியர் பற்றாக்குறை எனும் சவால்

பிப்ரவரி 10-ம் தேதி முதல் விமான பணியாளர்களின் வேலை நேர கட்டுப்பாடுகள் (FDTL) தொடர்பான சலுகைகள் திரும்ப பெறப்பட உள்ளன. தன்னிடம் போதிய எண்ணிக்கையிலான விமானிகள் இருப்பதாக இண்டிகோ கூறினாலும், விமானப் போக்குவரத்து நிபுணர்கள் அதனை மறுக்கின்றனர். புதிய விதிமுறைகளின்படி பார்த்தால், தற்போதுள்ள விமானங்களின் எண்ணிக்கைக்கு ஏற்ப கூடுதல் விமானிகள் தேவைப்படுவார்கள் என்றும், இது சரிசெய்யப்படாவிட்டால் மீண்டும் ஒரு பெரிய சேவை முடக்கம் ஏற்பட வாய்ப்புள்ளதாகவும் நிபுணர் கேப்டன் எம். ரங்கநாதன் எச்சரித்துள்ளார்.

ஆதங்கம்

விமானிகளின் ஆதங்கம்

மற்ற நாடுகளுடன் ஒப்பிடுகையில் இந்தியாவில் விமானிகளின் ஊதியம் மிகக் குறைவாக இருப்பதாகவும், அதிக வரி செலுத்தும் தங்களுக்கு முறையான பணிச்சூழல் இல்லை என்றும் விமானிகள் தரப்பில் கூறப்படுகிறது. இத்தகைய அழுத்தங்கள் மற்றும் பற்றாக்குறைகள் இந்திய விமானப் போக்குவரத்துத் துறையின் எதிர்காலத்தைப் பாதிக்கும் காரணியாக உருவெடுத்துள்ளன. வெறும் வாய்மொழி உறுதிமொழிகளைத் தாண்டி, விமான நிறுவனங்கள் தங்களது ஊழியர் பலத்தை அதிகரிக்க வேண்டிய கட்டாயத்தில் உள்ளன.