கச்சா எண்ணெய் மீதான விண்ட்ஃபால் வரியை ரூ.2,500 குறைத்தது மத்திய அரசு; டீசல், ஏடிஎஃப் மீதான வரி ரத்து
செய்தி முன்னோட்டம்
பெட்ரோலிய கச்சா எண்ணெய் மீதான விண்ட்ஃபால் வரியை ஒரு மெட்ரிக் டன்னுக்கு ரூ.4,600லிருந்து ரூ.2,100 ஆக மத்திய அரசு குறைத்துள்ளது. இந்த உத்தரவு சனிக்கிழமை (ஆகஸ்ட் 17) அமலுக்கு வந்துள்ளது.
முன்னதாக, ஜூலை 31ஆம் தேதி கச்சா எண்ணெய் மீதான விண்ட்ஃபால் வரி 34.2 சதவீதம் குறைக்கப்பட்டு டன்னுக்கு ரூ.4,600 ஆக இருந்தது குறிப்பிடத்தக்கது.
இதற்கிடையே, தற்போது டீசல் மற்றும் விமான எரிபொருள் (ஏடிஎஃப்) ஏற்றுமதிக்கு விண்ட்ஃபால் வரி ரத்து செய்யப்பட்டுள்ளது.
இந்தியா முதலில் ஜூலை 2022இல் கச்சா எண்ணெய் உற்பத்தியாளர்கள் மீது விண்ட்ஃபால் வரியை விதிக்கத் தொடங்கியது. பெட்ரோல், டீசல் மற்றும் விமான எரிபொருள் ஏற்றுமதிக்கு மட்டும் இந்த வரி விதிக்கப்பட்டது.
விண்ட்ஃபால் வரி
சர்வதேச நிலவரத்துக்கு ஏற்ப மாற்றியமைக்கப்படும் விண்ட்ஃபால் வரி
விண்ட்ஃபால் வரி என்பது தனியார் எண்ணெய் சுத்திகரிப்பு நிறுவனங்களால் உள்நாட்டில் விற்பனை செய்வதை விட சுத்திகரிக்கப்பட்ட எண்ணையை வெளிநாடுகளுக்கு அதிகம் ஏற்றுமதி செய்வதற்கு கட்டுப்பாடு விதிக்கவே கொண்டுவரப்பட்டது.
சர்வதேச கச்சா எண்ணெய் மற்றும் பொருட்களின் விலையில் ஏற்படும் ஏற்ற இறக்கங்களைக் கருத்தில் கொண்டு, இரண்டு வாரங்களுக்கு ஒருமுறை மாற்றி அமைக்கப்படுகிறது.
எதிர்பாராத சூழ்நிலைகள் காரணமாக, ஒரு தொழில் வழக்கத்திற்கு மாறாக அதிக லாபத்தை அனுபவிக்கும் போது, அரசாங்கங்களால் விண்ட்ஃபால் வரிகள் விதிக்கப்படுகின்றன.
குறிப்பாக, ரஷ்யா-உக்ரைன் போரால் தேவை அதிகரிப்பால் எண்ணெய் நிறுவனங்கள் அதிக லாபங்களை பெற்றதை அடுத்து இந்தியா விண்ட்ஃபால் வரி விதிக்கப்பட்டது குறிப்பிடத்தக்கது.