எல்பிஜி தட்டுப்பாடு குறைய இன்னும் 4 வருஷம் ஆகுமா? வளைகுடா நாடுகளின் போர் பதற்றத்தால் இந்தியாவுக்கு வந்த சோதனை
செய்தி முன்னோட்டம்
இந்தியாவின் சமையல் எரிவாயு (எல்பிஜி) விநியோகச் சங்கிலி சீரடைய இன்னும் மூன்று முதல் நான்கு ஆண்டுகள் வரை ஆகக்கூடும் என அதிர்ச்சியூட்டும் தகவல்கள் வெளியாகியுள்ளன. வளைகுடா நாடுகளில் நிலவும் போர் பதற்றம், ஹார்முஸ் ஜலசந்தி முடக்கம் மற்றும் ஈரான் நடத்திய தாக்குதல்களால் எரிசக்தி உள்கட்டமைப்புகள் பாதிக்கப்பட்டுள்ளதே இதற்கு முக்கியக் காரணமாகும். வளைகுடா நாடுகளில் உள்ள எரிவாயு கிணறுகள் மற்றும் சுத்திகரிப்பு நிலையங்கள் நிரந்தரமாக சேதமடைந்துள்ளனவா அல்லது தற்காலிகமாக மூடப்பட்டுள்ளனவா என்பதில் நிலவும் தெளிவற்ற சூழல், இந்த நெருக்கடியை மேலும் தீவிரப்படுத்தியுள்ளது.
உற்பத்தி
உற்பத்தி முடக்கமும் 'ஷட்' (Shut) குறித்த மர்மமும்
உலகளாவிய எரிவாயு விநியோகஸ்தர்களிடமிருந்து கிடைத்துள்ள தகவல்களின்படி, இந்த மீட்பு காலம் மிக நீண்டதாக இருக்கும் என அரசு உயர் அதிகாரி ஒருவர் தெரிவித்துள்ளார். வளைகுடா நாடுகளில் உள்ள பல முக்கியமான எரிவாயு கிணறுகள் தற்போது 'மூடப்பட்டுள்ளன' (Shut). ஆனால் இந்த மூடல் என்பது கிணறுகள் முழுமையாக வற்றிப்போனதைக் குறிக்கிறதா அல்லது பாதுகாப்பு காரணங்களுக்காக தற்காலிகமாக நிறுத்தப்பட்டுள்ளதா என்பது இன்னும் தெளிவாகத் தெரியவில்லை. எதுவாக இருந்தாலும், விநியோகத்தை மீண்டும் பழைய நிலைக்குக் கொண்டு வரக் குறைந்தது மூன்று ஆண்டுகளாவது ஆகும் என்று விநியோகஸ்தர்கள் தரப்பில் எச்சரிக்கப்பட்டுள்ளது.
இந்தியா
இந்தியாவின் பலவீனம் மற்றும் இறக்குமதிச் சார்பு
எரிசக்தித் தேவைகளுக்காக இந்தியா மற்ற நாடுகளைப் பெருமளவில் சார்ந்து இருப்பதே இந்த நெருக்கடிக்கு அடிப்படையாகும். இந்தியாவின் மொத்த எல்பிஜி நுகர்வில் சுமார் 60 சதவீதம் வெளிநாடுகளில் இருந்தே இறக்குமதி செய்யப்படுகிறது. இதில் 90 சதவீத விநியோகம் ஹார்முஸ் ஜலசந்தி வழியாகவே வந்து கொண்டிருந்தது. தற்போது இந்த வழித்தடம் முடக்கப்பட்டுள்ளதால் இந்தியா பெரும் சிக்கலில் மாட்டியுள்ளது. மேலும், இந்தியாவிடம் வெறும் 15 நாட்களுக்குத் தேவையான எரிவாயுவை மட்டுமே சேமித்து வைக்கும் வசதி உள்ளது. ஆண்டுக்கு 33 மில்லியன் டன் தேவை இருக்கும் ஒரு நாட்டில், இவ்வளவு குறைந்த சேமிப்புத் திறன் ஒரு மிகப்பெரிய பலவீனமாகப் பார்க்கப்படுகிறது.
விலை உயர்வு
விலை உயர்வு மற்றும் விநியோகக் கட்டுப்பாடு
இந்த விநியோகத் தட்டுப்பாட்டின் தாக்கம் ஏற்கனவே சாமானிய மக்களைப் பாதிக்கத் தொடங்கியுள்ளது. மார்ச் மாத பாதியிலிருந்து ஒரு வீட்டு உபயோக சிலிண்டரின் (14.2 கிலோ) விலை ₹60 வரையும், வணிக ரீதியான சிலிண்டர்களின் விலை ₹115 வரையும் உயர்ந்துள்ளது. நிலைமையைச் சமாளிக்க, மத்திய அரசு தொழில்துறை பயன்பாட்டை விட வீட்டு உபயோகத்திற்கு முன்னுரிமை அளித்து வருகிறது. மேலும், இரண்டு சிலிண்டர் முன்பதிவுகளுக்கு இடையிலான கால இடைவெளியையும் அரசு அதிகரித்துள்ளது. வளைகுடா நாடுகளைச் சார்ந்திருப்பதை 90 சதவீதத்திலிருந்து 55 சதவீதமாக இந்தியா குறைத்திருந்தாலும், இன்னும் 40 முதல் 50 சதவீத விநியோகத் தட்டுப்பாடு நிலவுவது கவலைக்குரிய விஷயமாகும். இதனால் மாற்று எரிசக்தி வழிகளை இந்தியா விரைவாகக் கண்டறிய வேண்டிய கட்டாயத்தில் உள்ளது.