ட்ரெஷரி பில்களில் முதலீடு செய்வது எப்படி?
செய்தி முன்னோட்டம்
பாதுகாப்பான மற்றும் குறுகிய கால முதலீட்டு வாய்ப்பைத் தேடுபவர்களுக்கு, ட்ரெஷரி பில்களில் (T-பில்ஸ்) முதலீடு செய்வது ஒரு புத்திசாலித்தனமான முடிவாக இருக்கும். இவை அரசாங்கத்தால் வெளியிடப்படும் பத்திரங்கள். இவற்றின் முதிர்வு காலம் சில நாட்கள் முதல் ஒரு வருடம் வரை இருக்கும். இந்த T-பில்ஸ், தள்ளுபடி விலையில் விற்கப்படுகின்றன. முதலீடு செய்தவர்களுக்கு, முதிர்வு காலத்தில் பில்லின் முழு அசல் மதிப்பு கிடைக்கும். இதனால, தங்கள் பணத்தை பாதுகாப்பாக முதலீடு செய்து, அதே நேரத்தில் கொஞ்சம் லாபமும் சம்பாதிக்க நினைப்பவர்களுக்கு, இது ஒரு நல்ல வாய்ப்பாக அமைகிறது.
#1
ட்ரெஷரி பில்களைப் புரிந்துகொள்வோம்
ட்ரெஷரி பில்ஸ் என்பவை, அரசாங்கம் நிதி திரட்டுவதற்காக வெளியிடும் குறுகிய கால கடன் பத்திரங்கள் ஆகும். இவை ஏலங்கள் மூலம் விற்கப்படுகின்றன. வங்கிகள் அல்லது நிதி நிறுவனங்கள் வழியாகவும் இவற்றை வாங்கலாம். இதில் முதலீடு செய்யத் தேவையான குறைந்தபட்சத் தொகை பொதுவாகக் குறைவாகவே இருக்கும். இதனால் தனிப்பட்ட முதலீட்டாளர்களும் இதில் எளிதாகப் பங்கேற்க முடியும். T-பில்களுக்கு மாதாந்திர வட்டி கிடைக்காது. மாறாக, இவை தங்கள் அசல் மதிப்பை விடக் குறைந்த விலையில் விற்கப்படுகின்றன. இந்த விலை வித்தியாசம் தான் முதலீட்டாளரின் லாபமாகக் கருதப்படுகிறது.
#2
T-பில்களை வாங்குவது எப்படி?
T-பில்களை வாங்குவதற்கு, ஒன்று ஏலத்தில் பங்கேற்கலாம் அல்லது ஒரு தரகர் (ப்ரோக்கர்) மூலம் வாங்கலாம். ஏலங்கள் தொடர்ந்து நடைபெறுகின்றன. இதில் முதலீட்டாளர்கள், தாங்கள் ஏற்றுக்கொள்ளும் தள்ளுபடி விகிதத்தின் அடிப்படையில் ஏலம் கேட்பார்கள். இதற்கு மாற்றாக, சில தரகர்கள், முன்னரே நிர்ணயிக்கப்பட்ட விகிதங்களில் T-பில்களை நேரடியாக வாங்க வழிவகை செய்கிறார்கள். ஏல செயல்முறையைப் புரிந்துகொள்வதும், முதலீடு செய்வதற்கு முன்பு தெளிவான முதலீட்டு இலக்குகளை நிர்ணயிப்பதும் மிக முக்கியம்.
#3
T-பில்களில் முதலீடு செய்வதன் நன்மைகள்
T-பில்களில் முதலீடு செய்வதன் மிக முக்கியமான நன்மைகளில் ஒன்று, அவை அரசாங்கத்தின் ஆதரவுடன் வருவதால், முதலீட்டுக்குப் பாதுகாப்பை உறுதி செய்கிறது. இது பணப்புழக்கத்தையும் (லிக்விடிட்டி) வழங்குகிறது. அதாவது, முதிர்வு காலத்திற்கு முன்பே, இரண்டாம் நிலை சந்தைகள் (செகண்டரி மார்க்கெட்ஸ்) மூலம் இவற்றை எளிதாகப் பணமாக மாற்ற முடியும். மேலும், T-பில்களை வாங்கும்போதே, எந்தத் தள்ளுபடி விலையில் வாங்குகிறோம் என்பது தெரிவதால், நமக்குக் கிடைக்கும் லாபத்தையும் முன்கூட்டியே கணிக்க முடியும்.
#4
T-பில்களுடன் தொடர்புடைய அபாயங்கள்
T-பில்கள் குறைந்த அபாயமுள்ள முதலீடுகளாகக் கருதப்பட்டாலும், அவற்றில் சில அபாயங்களும் இருக்கத்தான் செய்கின்றன. இவற்றில் உள்ள மிகப்பெரிய அபாயம், வாய்ப்புச் செலவு (ஆப்பர்ச்சூனிட்டி காஸ்ட்) ஆகும். அதாவது, T-பில்களில் முதலீடு செய்யப்பட்டிருக்கும் பணத்தை, அதிக லாபம் தரக்கூடிய மற்ற முதலீடுகளுக்குப் பயன்படுத்த முடியாமல் போகலாம். மேலும், நாம் T-பில்களை வாங்கிய தள்ளுபடி விகிதத்தை விட பணவீக்கம் (இன்ஃப்ளேஷன்) அதிகமாக இருந்தால், T-பில்களின் உண்மையான லாபம் குறைந்துவிட வாய்ப்புள்ளது.