8வது ஊதியக் குழு: ரயில்வே ஊழியர்களுக்கு ஊதிய உயர்வு மற்றும் ஆபத்துப்படி கோரி AIRF மனு
செய்தி முன்னோட்டம்
அகில இந்திய ரயில்வே தொழிலாளர்கள் சம்மேளனம் (AIRF), மத்திய 8வது ஊதியக் குழுவிடம் ரயில்வே ஊழியர்களுக்கான ஊதிய உயர்வு மற்றும் படிகள் குறித்த கோரிக்கைகளை வலியுறுத்தியுள்ளது. மும்பையில் ஊதியக் குழுவை சந்தித்த சம்மேளன பிரதிநிதிகள், அது தொடர்பாக விரிவான கடிதம் ஒன்றை அனுப்பியுள்ளனர். அனைத்துக் காலநிலைகளிலும் வருடம் முழுவதும் 24 மணி நேரமும் இயங்கும் இந்திய ரயில்வேயின் தனித்துவமான பணிச்சூழலைக் கருத்தில் கொண்டு, ஊழியர்களுக்கு உரிய அங்கீகாரம் வழங்கப்பட வேண்டும் என அந்த கடிதத்தில் சுட்டிக்காட்டப்பட்டுள்ளது.
சிறப்புப் படிகள்
பாதுகாப்புப் படையினருக்கு இணையான சேவை மற்றும் சிறப்புப் படிகள்
இயற்கை பேரிடர்கள், போர்க்கால சூழல்கள் மற்றும் பெருந்தொற்று நேரங்களில் நாட்டின் முன்னணியில் நின்று சேவை செய்வதால் ரயில்வே துறை இரண்டாவது பாதுகாப்பு அரணாகக் கருதப்படுகிறது.
எனவே, பணியின் போது ஏற்படும் உயிரிழப்புகள் மற்றும் படுகாயங்களைக் கருத்தில் கொண்டு ஊழியர்களுக்கு சிறப்புப் படிகள் வழங்கப்பட வேண்டும் என வலியுறுத்தப்பட்டுள்ளது.
இதன்படி ஆபத்து மற்றும் கடின பணிப்படி (Risk & Hardship), ஆபத்தான வேலைக்கான படி (Hazardous Duty), மலைப் பகுதிப் படி மற்றும் சீருடைப் படி ஆகியவற்றை வழங்கிடக் கோரப்பட்டுள்ளது.
ஊதிய சமநிலை
ட்ராக் மெயின்டெய்னர்களுக்கான ஊதிய சமநிலை மற்றும் சிறப்பு உதவிகள்
ரயில் தண்டவாளங்களின் பராமரிப்பு மற்றும் நவீனமயமாக்கல் காரணமாக சிவில் இன்ஜினியரிங் பிரிவில் பணிபுரியும் ட்ராக் மெயின்டெய்னர்கள் அதிக தொழில்நுட்ப அறிவு பெற்றிருக்க வேண்டியுள்ளது.
எனவே, அவர்களை பிற இன்ஜினியரிங் துறைகளின் தொழில்நுட்பப் பணியாளர்களுக்கு இணையான ஊதியப் பிரிவில் சேர்க்க வேண்டும் என AIRF கோரியுள்ளது.
மேலும் தண்டவாளப் பராமரிப்பாளர்கள், கேட்மேன், கீமேன் மற்றும் ரோந்துப் பணியாளர்களுக்குப் பணியில் உள்ள அபாயங்களைக் கருத்தில் கொண்டு சில குறிப்பிட்ட சிறப்புப் படிகளையும் வழங்க வேண்டும் என வலியுறுத்தப்பட்டுள்ளது.
பதவி உயர்வு
தொழில்நுட்பப் பணியாளர்களின் ஊதிய உயர்வு மற்றும் பதவி உயர்வு வாய்ப்புகள்
ரயில்வேயின் அனைத்து இன்ஜினியரிங் துறைகளிலும் உள்ள தொழில்நுட்பப் பணியாளர்களுக்கு சிறந்த ஊதிய விகிதங்களை வழங்க வேண்டும் என சம்மேளனம் கேட்டுக்கொண்டுள்ளது.
மேலும், இடைப்பட்ட ஊதியப் பிரிவுகளை ஒன்றாக இணைப்பதன் மூலம் ஊழியர்களுக்கு விரைவான பதவி உயர்வு வாய்ப்புகள் கிடைக்கும் எனத் தெரிவிக்கப்பட்டுள்ளது.
ரயில்வே சொத்துகளைப் பராமரிக்கும் மற்றும் இயக்கும் திறன் வாய்ந்த தொழிலாளர்களின் கடின உழைப்பைக் கருத்தில் கொண்டு, அனைத்து தொழில்நுட்ப பணியாளர்களுக்கும் போதுமான ஆபத்துப்படி மற்றும் சீருடைப்படியை வழங்கி ஊதியக் குழு கௌரவிக்க வேண்டும் எனவும் கேட்டுக்கொள்ளப்பட்டுள்ளது.