புதிய ரூமியான் எம்பிவி மாடலை இந்தியாவில் அறிமுகப்படுத்தியிருக்கிறது டொயோட்டா
செய்தி முன்னோட்டம்
புதிய ரூமியான் கார் மாடலை டொயோட்டா நிறுவனம் இந்தியாவில் வெளியிடவிருப்பதாக கடந்த சில மாதங்களாகவே தகவல் வெளியாகி வந்த நிலையில், இந்தியாவிற்கான ரூமியானை தற்போது அறிமுகப்படுத்தியிருக்கிறது டொயோட்டா.
மாருதி சுஸூகி எர்டிகாவை ரீபேட்ஜ் செய்து ஏற்கனவே தென்னாப்பிரிக்காவில் விற்பனை செய்து வந்தது டொயோட்டா. தற்போது அதனை இந்தியாவிலும் அறிமுகப்படுத்தியிருக்கிறது. இது டொயோட்டா மற்றும் மாருதி நிறுவனங்களிடையேயான 4-வது ரீபேட்ஜ்டு மாடலாகும்.
இந்தியாவில் இன்னோவா கிரிஸ்டா, இன்னோவா ஹைகிராஸ் மற்றும் வெல்ஃபையர் ஆகிய ப்ரீமியம் எம்பிவிக்களை டொயோட்டா விற்பனை செய்து வரும் நிலையில், இந்த ரூமியானை தொடக்கநிலை எம்பிவியாக விற்பனை செய்யவிருக்கிறது டொயோட்டா.
கிளான்ஸாவைப் போல இந்த ரூமியானையும், தங்கள் தொழிற்சாலையில் உற்பத்தி செய்து டொயோட்டாவுக்கு வழங்கவிருக்கிறது மாருதி சுஸூகி நிறுவனம்.
டொயோட்டா
டொயோட்டா ரூமியான்: என்ன எதிர்பார்க்கலாம்?
எர்டிகாவின் ஸ்டைலில் சின்னச் சின்ன மாற்றங்களை மட்டுமே மேற்கொண்டு ரூமியானாக விற்பனை செய்யவிருக்கிறது டொயோட்டா. அந்நிறுவனத்தின் பிற எம்பிவிக்களில் இருக்கும் டிசைன்களை ரூமியானிலும் எதிர்பார்க்கலாம்.
எர்டிகாவில் பயன்படுத்தப்பட்டிருக்கும், 103hp பவர் மற்றும் 137Nm டார்க்கை உற்பத்தி செய்யக்கூடிய 1.5 லிட்டர் பெட்ரோல் இன்ஜினே ரூமியானிலும் கொடுக்கப்படவிருக்கிறது. இந்த இன்ஜினுடன் 5-ஸ்பீடு மேனுவல் மற்றும் 6-ஸ்பீடு டார்க் கன்வர்ட்டர் ஆட்டோமேட்டிக் ஆகிய கியர்பாக்ஸ் ஆப்ஷன்கள் வழங்கப்படவிருக்கின்றன.
மேற்கூறிய பெட்ரோல் இன்ஜினுடன், ரூமியானின் CNG கிட்டைக் கொண்ட மாடல் ஒன்றையும் விற்பனை செய்யவிருக்கிறது டொயோட்டா. இந்த மாடலானது CNG மோடில் 88hp பவரையும், 121.5Nm டார்க்கையும் உற்பத்தி செய்யும் திறனைக் கொண்டிருக்கப் போவதாகத் தெரிவித்திருக்கிறது டொயோட்டா.