இந்தியாவில் வெளியானது 'ஓக்கினாவா OKHi-90' எலெக்ட்ரிக் ஸ்கூட்டர்
செய்தி முன்னோட்டம்
2023-ம் ஆண்டுக்கான அப்டேட் செய்யப்பட்ட OKHi-90 எலெக்ட்ரிக் ஸ்கூட்டரை இந்தியாவில் வெளியிட்டிருக்கிறது ஓக்கினாவா நிறுவனம். கடந்த 2022-ல் இந்த மாடலை இந்தியாவில் அறிமுகப்படுத்தியது ஓக்கினாவா. அறிமுகப்படுத்தப்பட்ட முதல் மாதத்திலேயே 10,000 முன்பதிவுகளைப் பெற்றது இந்த மாடல்.
தற்போது இந்த அப்டேட் செய்யப்பட்ட மாடலில் புதிய எலெக்ட்ரிக் மோட்டாரைக் கொடுத்திருப்பதோடு, பல்வேறு கனெக்டிவிட்டி வசதிகளையும் அளித்திருக்கிறது ஓக்கினாவா.
இத்தாலியைச் சேர்ந்த எலெக்ட்ரிக் பைக் உற்பத்தியாளரான டேக்டிகாவுடன் இணைந்து உருவாக்கிய 3.8kW எலெக்ட்ரிக் மோட்டாரை புதிய OKHi-90-யில் கொடுத்திருப்பதாகத் தெரிவித்திருக்கிறது அந்நிறுவனம்.
இந்த புதிய எலெக்ட்ரிக் மோட்டாரானது, எளிதாக சர்வீஸ் செய்யும் வகையிலும், நன்றாக வெப்பத்தைக் கையாளும் வகையிலும் உருவாக்கப்பட்டிருப்பதாகத் தெரிவித்திருக்கிறது ஓக்கினாவா.
ஓக்கினாவா
ஓக்கினாவா OKHi-90: விலை மற்றும் பிற வசதிகள்
புதிய எலெக்ட்ரிக் ஸ்கூட்டரில் 3.6kWh லித்தியம்-அயன் பேட்டரியைக் கொடுத்திருக்கிறது ஓக்கினாவா. அதிகபட்சமாக 90 கிமீ வேகத்தில் செல்லும் திறனைக் கொண்டிருக்கும் இந்த எலெக்ட்ரிக் ஸ்கூட்டரானது, ஒரு முறை சார்ஜ் செய்தால் 160 கிமீ வரை செல்லும் திறனைப் பெற்றிருக்கிறது.
சாதாரண சார்ஜரின் மூலம் சார்ஜ் செய்தால், 5 முதல் 6 மணி நேரத்தில் முழுமையாக சார்ஜ் ஆகிவிடுகிறது இந்த புதிய எலெக்ட்ரிக் ஸ்கூட்டர்.
எல்இடி லைட்டுகள், 40 லிட்டர் பூட் ஸ்பேஸ், ப்ளூடூத் கனெக்டிவிட்டி, நோட்டிபிகேஷன் மற்றும் கால் அலர்ட், USB போர்ட், மொபைல் ஆப் கனெக்ட்டிவிட்டி ஆகிய வசதிகள் வழங்கப்பட்டிருக்கின்றன.
ரூ.1.86 லட்சம் எக்ஸ்-ஷோரூம் விலையில் இந்தியாவில் வெளியிடப்பட்டிருக்கிறது ஓக்கினாவாவின் இந்த புதிய OKHi-90 எலெக்ட்ரிக் ஸ்கூட்டர்.