ஜூலையில் வெளியாகவிருக்கும் மாருதியின் புதிய MPV.. என்ன கார் என்று தெரியுமா?
செய்தி முன்னோட்டம்
இந்திய ஆட்டோமொபைல் சந்தையில் புதிய எம்பிவி ஒன்றை அறிமுகப்படுத்தவிருப்பதாக கடந்த ஆண்டே தெரிவித்திருந்தது மாருதி சுஸூகி. அந்த புதிய மாடலை வரும் ஜூலையில் அறிமுகம் செய்வதாக தகவல் வெளியாகியிருக்கிறது. டொயோட்டா இன்னோவா ஹைகிராஸை அடிப்படையாகக் கொண்டு உருவாக்கப்பட்டிருக்கும் இந்தப் புதிய மாடலானது டொயோட்டாவின் பிடாடி தொழிற்சாலையில் தயாரிக்கப்பட்டு மாருதிக்கு சப்ளை செய்யப்படவிருக்கிறது. 2022-2023 நிதியாண்டின் இறுதியில் புதிய எம்பிவி ஒன்றை தயாரித்து, அதனை மாருதியுடனும் பகிர்ந்து கொள்ளவிருப்பதாக கடந்த ஆண்டே குறிப்பிட்டிருந்தது டொயோட்டா. அதனையே வரும் ஜூலையில் வெளியிடவிருப்பதாகத் தெரிவித்திருக்கிறது மாருதி. முன்னர மாருதியின் மாடல்களையே டொயோட்டா தங்கள் பெயரில் மறுசீரமைத்து வெளியிட்டு வந்த நிலையில், டொயோட்டாவின் கார் மாடல் ஒன்றை தன்னுடைய பெயரில் மறுசீரமைத்து மாருதி வெளியிடுவது இதுவே முதல் முறை.
ஆட்டோ
என்ன எதிர்பார்க்கலாம்?
டொயோட்டாவின் மாடல் தான் என்றாலும், தனக்கே உரிய ஸ்டைலிங் மாற்றங்களை மாருதி செய்யத் தவறாது. முக்கியமாக கிரில், முகப்பு விளக்குகள், பின்பக்க விளக்குகள் மற்றும் பம்பர் ஆகியவற்றில் டிசைன் மாற்றங்களை நாம் எதிர்பார்க்கலாம். ஹைரடர் மற்றும் கிராண்டு விட்டாரா மாடல்களில் உள்பக்கங்களைப் போலவே இதன் உள்பக்கங்களையும், மாருதி மாற்றியமைக்கலாம் எனத் தெரிகிறது. இன்னோவா ஹைகிராஸில் பயன்படுத்தப்பட்ட பெட்ரோல் மற்றும் ஹைபிரிட் பெட்ரோல் இன்ஜின்களே மாருதியின் புதிய எம்பிவியிலும் பயன்படுத்தப்பட்டிருக்கும் என எதிர்பார்க்கப்படுகிறது. மேலும், இந்த புதிய எம்பிவி தான் மாருதியின் லைன்-அப்பிலேயே மிகவும் விலையுயர்ந்த மாடலாக இருக்குமாம். எனவே, இதனை தங்களது ஃப்ளாக்ஷிப் காராக நெக்ஸா டீலர்ஷிப்களின் மூலம் விற்பனை செய்யவிருக்கிறது மாருதி.