புனே-வில் 1000 கோடி மதிப்பில் புதிய EV தொழிற்சாலை: மஹிந்திரா நிறுவனத்தின் முதலீடு
மஹிந்திரா & மஹிந்திரா நிறுவனம் சுமார் 1000 கோடி ருபாய் செலவில் புனேவில் EV தொழிற்சாலை தொடங்கவிருப்பதாக அறிவித்து உள்ளது. இந்த தொழிற்சாலை அமைய 7 -8 வருடங்கள் ஆகும் எனவும் தெரிவிக்கப்பட்டுள்ளது. இது குறித்து பேசிய மஹிந்திராவின் மூத்த அதிகாரி, "70 ஆண்டுகளுக்கும் மேலாக எங்கள் தாய் மண்ணை போல் இருக்கும் இந்த மாநிலத்தில் முதலீடு செய்வதை பெருமையாக கருதுகிறோம். அரசின் இந்த ஒப்புதலால் நாங்கள் மகிழ்ச்சியடைகிறோம். மகாராஷ்டிரா அரசின் தொடர் ஆதரவிற்காக நாங்க நன்றிக்கடன் பட்டுளோம்", எனக்கூறினார். மேலும், " இந்த முதலீடு, இந்திய மற்றும் அன்னிய நேரடி முதலீட்டை ஈர்க்கும் வகையிலும், இந்தியாவின் EV மையமாக மகாராஷ்டிரா மாறுவதற்கு ஒரு உந்துகோலாய் செயல்படும்" என அவர் கூறினார்.
EV தொழிற்சாலை
புனேயில் உருவாகவுள்ள இந்த புதிய தொழிற்சாலை, மஹிந்திராவின் வருங்கால தயாரிப்பான பார்ன் எலக்ட்ரிக் வாகனங்களின் (BEVs) மேம்பாடு மற்றும் உற்பத்திக்காக செயல்படும். இந்த BEVக்கள் ஐந்து மாறுபாடுகளை, அடுத்த 3 ஆண்டுகளில் படிப்படியாக அறிமுகப்படுத்த திட்டமிட்டுள்ளதாக செய்திகள் தெரிவிக்கின்றன. மஹிந்திராவின் EVகள் அதிநவீன INGLO EV பிளாட்ஃபார்மை கொண்டு தயாரிக்கப்படும் எனவும், அவை மஹிந்திராவின் சின்னமான XUV லோகோவுடன் 'BE'(பார்ன் எலக்ட்ரிக்) என மின்சார வாகனங்களுக்கான, மஹேந்திராவின் பிரத்யேக தயாரிப்பாக வெளியிடப்படும் என கூறப்படுகிறது. ஊடகங்களின் ஆராய்ச்சி படி, மஹிந்திரா, மின்சார 3 சக்கர வாகன சந்தையில் முன்னோடியாக திகழ்கிறது எனவும், எனினும் மின்சார SUV வாகனம் தயாரிப்பில் டாடா மோட்டார்ஸ் தான் முன்னணி வகிப்பதாக தெரிவிக்கிறது.
