கார் வாங்கினால் கால்பந்து உலகக்கோப்பை போட்டியை இலவசமாக நேரில் பார்க்கலாம்; கியா நிறுவனத்தின் அட்டகாச அறிவிப்பு
செய்தி முன்னோட்டம்
2007 ஆம் ஆண்டு முதல் ஃபிஃபா அமைப்பின் உலகளாவிய அதிகாரப்பூர்வ கூட்டாளியாக இருந்து வரும் கியா நிறுவனம், 2026 ஆம் ஆண்டு அமெரிக்காவில் நடைபெறவுள்ள ஃபிஃபா உலகக்கோப்பை கால்பந்து போட்டியை முன்னிட்டு இந்திய வாடிக்கையாளர்களுக்காக இரண்டு பிரத்யேகத் திட்டங்களை அறிமுகப்படுத்தியுள்ளது. 'கியா வாக் வித் சேம்பியன்ஸ்' (Kia Walk with Champions) மற்றும் 'கியா டிரைவ் டு ஃபிபா வேர்ல்ட் கப் 2026' (Kia Drive to FIFA World Cup 2026) ஆகிய இந்தத் திட்டங்கள், கார் வாங்குவதை ஒரு கனவு நனவாகும் வாய்ப்பாக மாற்றுகின்றன.
குழந்தைகள்
'கியா வாக் வித் சேம்பியன்ஸ்': குழந்தைகளுக்கு ஒரு அரிய வாய்ப்பு
இந்தத் திட்டத்தின் மூலம், இந்தியாவில் இருந்து இரண்டு சிறுவர்கள் (10 முதல் 14 வயது வரை) அமெரிக்காவில் நடைபெறும் ஃபிஃபா உலகக்கோப்பை லீக் போட்டியில் 'அதிகாரப்பூர்வ மேட்ச் பால் கேரியர்களாக' (Official Match Ball Carriers - OMBC) மைதானத்திற்குள் நுழைய முடியும். 2026 பிப்ரவரி 12 முதல் மார்ச் 10 க்குள் கியா கேரன்ஸ் கிளாவிஸ் (Carens Clavis - ICE அல்லது EV) காரை முன்பதிவு செய்து வாங்குபவர்கள் இதில் பங்கேற்கலாம். குலுக்கல் முறையில் இரண்டு வெற்றியாளர்கள் தேர்ந்தெடுக்கப்படுவார்கள். தேர்ந்தெடுக்கப்படும் குழந்தை ஒரு பாதுகாவலருடன் அமெரிக்கா செல்லலாம். இதற்கான பயணம், விசா மற்றும் தங்குமிட செலவுகள் அனைத்தையும் கியா நிறுவனமே ஏற்கும்.
பரிசு
'கியா டிரைவ் டு ஃபிபா வேர்ல்ட் கப் 2026': வாடிக்கையாளர்களுக்கான பரிசு
இந்தத் திட்டத்தின் கீழ், இந்தியா முழுவதும் உள்ள நான்கு அதிர்ஷ்டசாலி வாடிக்கையாளர்கள் அமெரிக்காவில் நேரடி ஃபிஃபா உலகக்கோப்பை கால்பந்து போட்டியைக் காணும் வாய்ப்பைப் பெறுவார்கள். தகுதியான கார்கள்: செல்டோஸ், சோனெட், சைரோஸ் அல்லது கேரன்ஸ் கிளாவிஸ் ஆகிய கார்களைக் குறிப்பிட்ட காலத்திற்குள் வாங்குபவர்கள் இதில் கலந்துகொள்ளலாம். வெற்றியாளர்கள்: ஒவ்வொரு மாடலிலிருந்தும் தலா ஒரு வெற்றியாளர் வீதம் மொத்தம் 4 பேர் தேர்ந்தெடுக்கப்படுவார்கள். இவர்கள் தலா ஒரு நண்பர் அல்லது குடும்ப உறுப்பினரைத் தங்களுடன் அழைத்துச் செல்லலாம்.
நோக்கம்
கியா இந்தியாவின் நோக்கம்
இது குறித்துப் பேசிய கியா இந்தியாவின் விற்பனை மற்றும் சந்தைப்படுத்தல் பிரிவின் மூத்த துணைத் தலைவர் அதுல் சூட், "வெறும் வாகனங்களை விற்பனை செய்வதுடன் நிற்காமல், எங்கள் வாடிக்கையாளர்களுக்கு வாழ்நாளில் ஒருமுறை மட்டுமே கிடைக்கும் அற்புதமான அனுபவங்களை வழங்க விரும்புகிறோம். உலகக்கோப்பை கால்பந்து மைதானத்தில் ஒரு குழந்தையை அழைத்துச் செல்வது என்பது அந்த குடும்பத்திற்கே மறக்க முடியாத தருணமாக அமையும்." என்று தெரிவித்தார்.
விவரங்கள்
முக்கிய தேதிகள் மற்றும் விவரங்கள்
இந்தச் சலுகை 2026 பிப்ரவரி 12 முதல் மார்ச் 10 வரை செய்யப்படும் முன்பதிவுகளுக்கு மட்டுமே செல்லுபடியாகும். வெற்றியாளர்கள் அனைவரும் வெளிப்படையான தணிக்கை முறைப்படி குலுக்கல் முறையில் தேர்ந்தெடுக்கப்படுவார்கள். இது குறித்த கூடுதல் விபரங்களைக் கியா இந்தியாவின் அதிகாரப்பூர்வ இணையதளம் அல்லது அங்கீகரிக்கப்பட்ட டீலர்ஷிப்களில் தெரிந்து கொள்ளலாம்.