சிட்டி எலிகண்ட் எடிஷன் மற்றும் அமேஸ் எலைட் எடிஷனை வெளியிட்டுள்ளது ஹோண்டா
இந்தியாவில் செடான்களின் ராஜாவாகத் திகழும் 'சிட்டி' மாடலின் எலிகண்ட் எடிஷன் ஒன்றை வெளியிட்டிருக்கிறது ஹோண்டா. விழாக் காலத்தை முன்னிட்டு வெளியிடப்பட்டிருக்கும் இந்த எலிகண்ட் எடிஷனில் என்னென்ன கூடுதல் அம்சங்கள் இடம்பெற்றிருக்கின்றன, பார்க்கலாம். எலிகண்ட் எடிஷனில் வெளிப்புறம் பெரிதாக எந்த மாற்றமும் செய்யப்படவில்லை. டெயில் கேட்டில் எல்இடி லைட்டிங், முன்பக்க ஃபெண்டர் கார்னிஷ் மற்றும் தனித்துவமான எலிகண்ட் என்ற பேட்ஜூடன் கூடிய சீட் கவர்களைக் கொடுத்திருக்கிறது ஹோண்டா. ஹோண்டா சிட்டியின் V வேரியன்டை அடிப்படையாகக் கொண்ட இந்த எலிகண்ட் எடிஷனை வெளியிட்டிருக்கிறது ஹோண்டா. மேலும், எலிகண்ட் எடிஷனிலும் அதே 119hp பவர் 145Nm டார்க்கை வெளிப்படுத்தக்கூடிய 1.5 லிட்டர் பெட்ரோல் இன்ஜினே கொடுக்கப்பட்டிருக்கிறது.
ஹோண்டா சிட்டி எலிகண்ட் மற்றும் அமேஸ் எலைட்:
6 ஸ்பீடு மேனுவல் மற்றும் CVT ஆட்டோமேட்டிக் கியர்பாக்ஸ்களுடன், வயர்லெஸ் சார்ஜரையும் பெற்றிருக்கும் எலிகண்ட் எடிஷனை ரூ.12.57 லட்சம் எக்ஸ்-ஷோரூம் விலையில் வெளியிட்டிருக்கிறது ஹோண்டா. சிட்டி மட்டுமின்றி, விழாக் காலத்தை முன்னிட்டு தங்களுடைய மற்றொரு செடானான அமேஸின் எலைட் எடிஷன் ஒன்றையும் வெளியிட்டிருக்கிறது ஹோண்டா. அமேஸின் VX ட்ரிம்மை அடிப்படையாக வைத்து புதிய எலைட் எடிஷனை உருவாக்கியிருக்கிறது ஹோண்டா. மேனுவல் மற்றும் ஆட்டோமேட்டிக் என இரண்டு வகையான கியர்பாக்ஸ் ஆப்ஷன்களையும் கொண்டிருக்கும் அமேஸின் எலைட் எடிஷனை ரூ.9.04 லட்சம் முதல் ரூ.9.86 லட்சம் வரையிலான விலையில் வெளியிட்டிருக்கிறது ஹோண்டா.
