அமேஸ் மற்றும் சிட்டி மாடல்களுக்கு சலுகை அறிவித்திருக்கிறது ஹோண்டா.. என்னென்ன சலுகைகள்?
செய்தி முன்னோட்டம்
ஹோண்டா நிறுவனத்தின் செடான் மாடல் கார்களை நீங்கள் வாங்கத் திட்டமிட்டிருந்தால், இது தான் சரியான நேரம். இந்த ஜூன் மாதத்திற்கு மட்டும் தங்களது அமேஸ் மற்றும் சிட்டி ஆகிய செடான்களுக்கு ரூ.30,000 வரை சலுகையை அறிவித்திருக்கிறது ஹோண்டா. பணச் சலுகை, கார்ப்பரேட் சலுகை மற்றும் எக்ஸ்சேஞ்ச் போனஸ் எனப் பல்வேறு வகையில் இந்த சலுகையை வழங்குகிறது ஹோண்டா. 2023, ஜூன் 30-ம் தேதி வரை மட்டுமே இந்த சலுகைகள் வழங்கப்படும் எனத் தெரிவித்திருக்கிறது ஹோண்டா. எனினும், இந்த சலுகையானது நாட்டின் குறிப்பிட்ட டீலர்ஷிப்கள் மற்றும் மாடல்களுக்கு ஏற்ற வகையில் மாறுபடலாம் என்றும் குறிப்பிட்டிருக்கிறது அந்நிறுவனம்.
ஹோண்டா
செடான்களுக்கான சலுகைகள்:
தங்களுடைய தொடக்க நிலை செடானான அமேஸின் அடிப்படை மாடலை ரூ.7.01 லட்சம் எக்ஸ்-ஷோரும் விலையில் விற்பனை செய்து வருகிறது ஹோண்டா. இந்த அமேஸூக்கு பணச்சலுகையாக ரூ.10,946, கார்ப்பரேட் சலுகையாக ரூ.8,000, லாயல்டி பெனிஃபிட்டாக ரூ.5,000 மற்றும் எக்ஸ்சேஞ்ச் போனஸாக ரூ.7,000-த்தை வழங்குகிறது ஹோண்டா. தங்களது ஐந்தாம் தலைமுறை சிட்டிக்கு தொடக்க விலையாக ரூ.11.52 லட்சம் எக்ஸ்-ஷோரூம் விலையை நிர்ணயம் செய்து விற்பனை செய்து வருகிறது ஹோண்டா. இந்த சிட்டிக்கு பணச் சலுகையாக ரூ.12,296, கார்ப்பரேட் சலுகையாக ரூ.6,000 மற்றும் லாயல்டி பெனிஃபிட்டாக ரூ.5,000-த்தை வழங்குகிறது ஹோண்டா. மேலும், சிட்டி மாடலுக்கு எக்ஸ்சேஞ்ச் போனஸ் எதுவும் இல்லை எனவும் அந்நிறுவனம் தெரிவித்திருக்கிறது.