விபத்துகளைத் தவிர்க்க காரில் இருப்பது போன்ற நவீன டெக்னாலஜி; ஹீரோவின் மாஸ் அப்டேட்
செய்தி முன்னோட்டம்
இந்தியாவின் முன்னணி இரு சக்கர வாகனத் தயாரிப்பு நிறுவனமான ஹீரோ மோட்டோகார்ப், பிரான்ஸ் நாட்டைச் சேர்ந்த வேலியோ நிறுவனத்துடன் கைகோர்த்துள்ளது. இருசக்கர வாகனங்களில் மேம்பட்ட ஓட்டுநர் உதவி அமைப்புகளை (Advanced Rider Assistance Systems - ARAS) உருவாக்குவதே இந்தக் கூட்டணியின் முக்கிய நோக்கமாகும். இதன் மூலம் வரும் காலங்களில் ஹீரோவின் பைக்குகள் மற்றும் ஸ்கூட்டர்களில் கார் போன்ற நவீன பாதுகாப்பு அம்சங்களை நாம் எதிர்பார்க்கலாம்.
தொழில்நுட்பம்
நவீன ரேடார் மற்றும் கேமரா தொழில்நுட்பம்
இந்தத் திட்டத்தின் கீழ், ஹீரோ வாகனங்களில் அதி நவீன ரேடார் மற்றும் ஸ்மார்ட் கேமராக்கள் பொருத்தப்படும். இவை சாலையைத் தொடர்ந்து கண்காணித்து, ஓட்டுநருக்குச் சுதாரிப்பான எச்சரிக்கைகளை வழங்கும். குறிப்பாக, முன்னால் செல்லும் வாகனத்தின் மீது மோத வாய்ப்பிருந்தால் எச்சரிக்கும் 'ஃபார்வர்ட் கொல்லிஷன் வார்னிங்' (FCW), பின்னால் வரும் வாகனங்களைக் கண்டறியும் 'பிளைண்ட் ஸ்பாட் டிடெக்ஷன்' (BSD) மற்றும் 'லேன் சேஞ்ச் அசிஸ்ட்' போன்ற தொழில்நுட்பங்கள் இதில் அடங்கும்.
வசதி
அனைத்து மாடல்களுக்கும் விரிவடையும் வசதி
இந்தச் சொகுசு பாதுகாப்பு வசதிகள் ஹீரோவின் பிரிமீயம் பைக்குகளுக்கு மட்டுமின்றி, சாமானிய மக்கள் பயன்படுத்தும் என்ட்ரி-லெவல் பைக்குகள் மற்றும் ஸ்கூட்டர்களுக்கும் கொண்டு வரப்பட உள்ளது. மேலும், ஹீரோவின் மின்சார வாகன பிராண்டான 'விடா' (VIDA) மாடல்களிலும் இந்த ARAS தொழில்நுட்பம் பயன்படுத்தப்படும். இதனால் நகர்ப்புற நெரிசலில் வாகனம் ஓட்டும்போது பாதசாரிகள் மற்றும் பிற வாகனங்களை எளிதாகக் கண்டறிந்து விபத்துகளைக் குறைக்க முடியும்.
பயணம்
பாதுகாப்பான மற்றும் ஸ்மார்ட் பயணம்
குறைந்த வெளிச்சம் உள்ள நேரங்களிலும் சாலைக் குறியீடுகளை அடையாளம் காணும் திறன் மற்றும் லேன் மாறும்போது எச்சரிக்கை செய்யும் வசதிகள் ஓட்டுநர்களுக்குப் பெரும் உதவியாக இருக்கும். சாலைப் பாதுகாப்பில் ஒரு புதிய புரட்சியை ஏற்படுத்த ஹீரோ எடுத்துள்ள இந்த முயற்சி, இந்தியச் சாலைகளில் விபத்துகளின் எண்ணிக்கையைக் குறைக்க உதவும் என்று எதிர்பார்க்கப்படுகிறது. விரைவில் இந்தத் தொழில்நுட்பம் கொண்ட புதிய ஹீரோ பைக்குகள் சந்தைக்கு வரும் எனத் தெரிகிறது.