ஏசி வேணுமா? இல்ல ஜன்னலைத் திறக்கலாமா? கோடைகால கார் பயணத்தில் எரிபொருளை மிச்சப்படுத்தும் சிம்பிள் டெக்னிக்
செய்தி முன்னோட்டம்
ஒவ்வொரு கோடை காலத்திலும் கார் உரிமையாளர்கள் சந்திக்கும் பொதுவான கேள்வி, "எரிபொருளைச் சேமிக்க ஏசியை அணைத்துவிட்டு ஜன்னலைத் திறந்து வைக்கலாமா?" என்பதுதான். பலரும் ஏசியை அணைப்பது எப்போதும் எரிபொருளைச் சேமிக்கும் என்று நினைக்கிறார்கள். ஆனால் உண்மை அவ்வளவு எளிதல்ல. இது நீங்கள் பயணிக்கும் வேகத்தைப் பொறுத்தே அமைகிறது. ஒரு சிறிய புரிதல் மூலம், உங்கள் எரிபொருள் செலவை நீங்கள் கணிசமாகக் குறைக்க முடியும். இதுகுறித்து நாம் இங்கே விரிவாக தெரிந்துகொள்ளலாம்.
குறைந்த வேகம்
குறைந்த வேகத்தில் எது சிறந்தது?
நகரத்திற்குள் சுமார் 40-45 கிமீ வேகத்திற்குக் கீழ் வாகனம் ஓட்டும் போது, ஏசியை விட ஜன்னல்களைத் திறந்து வைப்பது அதிக எரிபொருள் சிக்கனத்தைத் தரும். குறைந்த வேகத்தில் காற்றின் எதிர்ப்பு மிகக் குறைவாக இருப்பதால், ஜன்னல்கள் காரின் இயக்கத்தைப் பெரிதும் பாதிக்காது. மாறாக, ஏசி கம்ப்ரஸர் என்ஜினின் மீது கூடுதல் சுமையை (3 முதல் 7 குதிரைத்திறன் வரை) ஏற்றுவதால், அது அதிக எரிபொருளைப் பயன்படுத்தத் தூண்டும். எனவே, போக்குவரத்து நெரிசலான நேரங்களில் ஜன்னல்களைத் திறந்து வைப்பதே புத்திசாலித்தனம்.
அதிக வேகம்
அதிவேகப் பயணத்தில் எது சிறந்தது?
நீங்கள் 50-60 கிமீ வேகத்திற்கு மேல் செல்லும் போது நிலைமை தலைகீழாக மாறுகிறது. அதிவேகத்தில் ஜன்னல்களைத் திறந்து வைக்கும்போது, காரின் உள்ளே காற்றோட்டம் சீரற்றதாகி, அது பாரசூட் விளைவை (Parachute effect) ஏற்படுத்துகிறது. இது காரின் ஏரோடைனமிக்ஸை (Aerodynamics) பாதித்து, என்ஜின் அந்த வேகத்தைத் தக்கவைக்கக் கூடுதல் கடினமாக உழைக்க வேண்டிய நிலையை உருவாக்குகிறது. சிறிய கார்களில் இந்த காற்றடைப்பு (Drag) 20% வரை எரிபொருள் பயன்பாட்டை அதிகரிக்கலாம். எனவே, நெடுஞ்சாலைகளில் பயணிக்கையில் ஜன்னல்களை மூடிவிட்டு ஏசியைப் பயன்படுத்துவதே எரிபொருள் சிக்கனத்திற்கு சிறந்த வழியாகும்.
டிப்ஸ்
ஏசி பயன்பாட்டை மேம்படுத்தும் எளிமையான டிப்ஸ்
ஏசி மற்றும் ஜன்னல் பயன்பாட்டில் உள்ள சிறிய மாற்றங்கள், உங்கள் காரின் மைலேஜை 1 முதல் 2 கிமீ வரை அதிகரிக்க உதவும்: பயணத்தைத் தொடங்கும் முன் ஜன்னல்களை ஒரு நிமிடம் திறந்து வைப்பது, உள்ளே சிக்கியிருக்கும் வெப்பக் காற்றை வெளியேற்றி, ஏசி விரைவாகக் குளிர்ச்சியடைய உதவும். கேபின் குளிர்ச்சியடைந்த பிறகு, ரீசர்குலேஷன் மோடைப் பயன்படுத்துவது ஏசி கம்ப்ரஸர் தொடர்ந்து கடினமாக உழைப்பதைத் தடுக்கும். முடிந்தவரை நிழலில் பார்க்கிங் செய்வது, காரின் உட்புற வெப்பத்தைத் தொடக்கத்திலேயே குறைவாக வைத்திருக்க உதவும். எப்போதும் அதிகபட்ச குளிர்ச்சியில் வைப்பதைத் தவிர்த்து, மிதமான வெப்பநிலையில் பராமரிப்பது என்ஜின் சுமையைக் குறைக்கும்.