அமெரிக்க செனட் தேர்தலில் வெற்றி பெற்ற முதல் முஸ்லிம்: அப்துல் அல்-சயீத்தின் கர்நாடக குடும்ப பிணைப்பு
செய்தி முன்னோட்டம்
அமெரிக்க நாடாளுமன்றத்தின் மேல்அவையான செனட் அவைக்கு தேர்ந்தெடுக்கப்பட்ட முதல் முஸ்லிம் அமெரிக்கர் என்ற வரலாற்றுப் பெருமையை ஜனநாயகக் கட்சியின் அப்துல் அல்-சயீத் பெற்றுள்ளார். மிச்சிகன் மாநில செனட் இடைத்தேர்தலில் குடியரசுக் கட்சியின் மைக் ரோஜர்ஸை வீழ்த்தி அவர் இமாலய வெற்றி பெற்றுள்ளார். அவரது இந்த வெற்றியைக் மிச்சிகன் மக்கள் மட்டுமின்றி, இந்தியாவின் கர்நாடக மாநிலத்தில் உள்ள பட்கல் பகுதி மக்களும் ஆவலுடன் கொண்டாடி வருகின்றனர்.
இந்தியன்
"அரபை விட நான் இந்தியன் தான்!": அல்-சயீத்தின் சுவாரஸ்யப் பேச்சு
எகிப்திய வம்சாவளியை சேர்ந்த 42 வயதான அல்-சயீத், தனது மனைவி சாரா ஜுகாகுவின் தென்னிந்திய குடும்பப் பின்னணி குறித்து பலமுறை நெகிழ்ச்சியுடன் பேசியுள்ளார்.
"கடந்த 20 ஆண்டுகளுக்கும் மேலாக ஒரு தென்னிந்தியக் குடும்பத்தில் மாப்பிள்ளையாக இருக்கிறேன். அந்தப் பண்பாட்டோடு நான் ஒன்றிணைந்துவிட்டேன். உண்மையைச் சொன்னால், நான் ஒரு அரேபியரை விட அதிக இந்தியனாக உணர்கிறேன்."
தனது வீட்டைச் சுற்றி 'தேசி' பெண்களே நிறைந்துள்ளதாக குறிப்பிட்ட அவர், தனக்கு இரு மகள்கள் (எம்மாளி, செரீன்) உள்ளதையும், பாகிஸ்தான் அமைப்பின் கூட்டத்தில் பேசியபோது தனது மனைவி பிரிவினைக்கு அக்கரையிலிருந்து (இந்தியா) வந்தவர் என்றும் சுட்டிக்காட்டியுள்ளார்.
குடும்பப் பின்னணி
யார் இந்த சாரா ஜுகாகு?
அப்துல் அல்-சயீத்தின் மனைவி சாரா ஜுகாகு, மனநல மருத்துவ பேராசிரியை ஆவார்.
மிச்சிகனில் பிறந்த இவரது குடும்ப வேர்கள் கர்நாடக மாநிலத்தின் கடலோர நகரமான பாட்கல் பகுதியைச் சேர்ந்தவை.
சாராவின் தாத்தா ஜே.ஹெச். ஷம்சுதீன் ஜுகாகு, மைசூர் மாகாணத்தின் முதலமைச்சர் பி.டி. ஜாட்டி அமைச்சரவையில் துணை நிதி அமைச்சராக பணியாற்றிய பிரபல வழக்கறிஞர் மற்றும் அரசியல் தலைவர் ஆவார்.
சாராவின் தந்தை டாக்டர் ஜுகாகு எஸ். தாயேப், பெங்களூரு மருத்துவக் கல்லூரியில் எம்.பி.பி.எஸ் முடித்து 1980-களில் அமெரிக்காவிற்கு குடிபெயர்ந்த சிறுநீரக மருத்துவர் ஆவார்.
சாரா மற்றும் அல்-சயீத் இருவரும் மிச்சிகன் பல்கலைக்கழகத்தில் சந்தித்துக் கொண்டனர்.
சாரா ஆக்ஸ்போர்டு மற்றும் கொலம்பியா பல்கலைக்கழகங்களில் உயர்கல்வி பெற்றவர். இவர்களுக்கு 2006-இல் திருமணம் நடைபெற்றது.
பாட்கல்
பாட்கலில் எதிரொலிக்கும் மகிழ்ச்சி அலை
அமெரிக்கச் செனட் தேர்தலில் அப்துல் அல்-சயீத் பெற்ற வெற்றியை, பாட்கலில் உள்ள ஜுகாகு குடும்பத்தினரும் அப்பகுதி மக்களும் இனிப்புகள் வழங்கி மகிழ்ச்சியுடன் கொண்டாடி வருகின்றனர்.
தங்களது பாட்டனார் ஷம்சுதீன் ஆற்றிய நேர்மையான பொதுச்சேவை மற்றும் வளர்ச்சிக் கொள்கைகளை அல்-சயீத் அமெரிக்க மண்ணிலும் தொடர்ந்து முன்னெடுத்துச் செல்வதாகக் குடும்ப உறுப்பினர்கள் பெருமிதத்துடன் தெரிவித்துள்ளனர்.